കേരള ക്രിക്കറ്റ് ലീഗിന്റെ മൂന്നാം സീസണിന് വ്യാഴാഴ്ച തുടക്കമാകും. മൂന്നാം സീസണിലെ ടീമുകളുടെ ഔദ്യോഗിക ലോഞ്ച് തിരുവനന്തപുരം കോവളത്ത് നടന്നു. ആറ് ഫ്രാഞ്ചൈസികളിലായി നൂറോളം താരങ്ങളാണ് ഇത്തവണ കെ.സി.എൽ പോരാട്ടത്തിനിറങ്ങുന്നത്. 17 ദിവസം നീളുന്ന ക്രിക്കറ്റ് മാമാങ്കത്തിന് സെപ്റ്റംബർ അഞ്ചിനാണ് സമാപനം.
കേരള ക്രിക്കറ്റ് അസോസിയേഷന്റെ കെ.സി.എൽ സീസൺ 3-ന് ഇനി രണ്ട് ദിവസം മാത്രം. വലിയ മാറ്റങ്ങളോടെയാണ് ഓരോ ടീമും ഇത്തവണ കളത്തിലിറങ്ങുന്നത്. കോവളം ലീല റാവിസിൽ നടന്ന ചടങ്ങിൽ ഫ്രാഞ്ചൈസികൾ ടീമംഗങ്ങളെ പരിചയപ്പെടുത്തി.
കെ.സി.എൽ ലീഗ് ഐക്കണും ഇന്ത്യൻ താരവുമായ സഞ്ജു സാംസണും ടീം ലോഞ്ച് ചടങ്ങിൽ ആശംസകളുമായി പങ്കെടുത്തു. കെ.സി.എൽ മികച്ച നിലവാരമുള്ള ലീഗാണെന്നും കഴിഞ്ഞ സീസണിൽ മികച്ച പ്രകടനം നടത്താൻ കഴിഞ്ഞെന്നും സഞ്ജു പറഞ്ഞു.
തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയത്തിലാണ് ഈ മാസം 20ന് സീസണിന് തുടക്കമാകുന്നത്. ട്രിവാൻഡ്രം റോയൽസ്, ഏരീസ് കൊല്ലം സെയ്‌ലേഴ്‌സ്, ആലപ്പി റിപ്പിൾസ്, കൊച്ചി ബ്ലൂ ടൈഗേഴ്‌സ്, തൃശൂർ ടൈറ്റൻസ്, കാലിക്കറ്റ് ഗ്ലോബ്സ്റ്റാർസ് എന്നീ ആറ് ടീമുകളാണ് ഇത്തവണ കിരീടത്തിനായി ഏറ്റുമുട്ടുന്നത്. ഫൈനൽ സെപ്റ്റംബർ അഞ്ചിന് നടക്കും
