സിഎംആർഎൽ-എക്സാലോജിക് ഇടപാടും അവയവക്കച്ചവട കേസും ഉൾപ്പെടെ പ്രധാന അന്വേഷണങ്ങൾ പുരോഗമിക്കുന്നതിനിടെ കൊച്ചി എൻഫോഴ്സ്മെന്റ് ഡയറക്ടറേറ്റ് ഓഫീസിൽ ഉന്നത ഉദ്യോഗസ്ഥരുടെ നിർണായക യോഗം ചേർന്നു. കേസുകളുടെ അന്വേഷണ പുരോഗതി വിലയിരുത്താനാണ് യോഗം.ഇഡി സ്പെഷ്യൽ ഡയറക്ടർ പ്രശാന്ത് കുമാർ നാളെ കൊച്ചിയിലെത്തി അന്വേഷണ പുരോഗതി നേരിട്ട് വിലയിരുത്തും.
ഇതിന് മുന്നോടിയായി കൊച്ചി ഓഫീസിന്റെ ചുമതലയുള്ള അഡീഷണൽ ഡയറക്ടർ അധ്യുതയ് ആനന്ദ് കൊച്ചിയിലെത്തി ഉദ്യോഗസ്ഥരുമായി കൂടിക്കാഴ്ച നടത്തി നിലവിലെ അന്വേഷണങ്ങളുടെ സ്ഥിതിഗതികൾ വിലയിരുത്തി.സിഎംആർഎൽ-എക്സാലോജിക് കേസിൽ വീണ ഉൾപ്പെടെയുള്ള പ്രതികളുടെ സ്വത്ത് കണ്ടുകെട്ടുന്നതിനുള്ള നടപടികൾ പുരോഗമിക്കുകയാണ്. സിഎംആർഎല്ലിൽ നിന്ന് പണം കൈപ്പറ്റിയതായി കണ്ടെത്തിയ മറ്റ് രാഷ്ട്രീയ നേതാക്കളുടെ വിവരങ്ങളും ഇഡി സമാഹരിച്ചിട്ടുണ്ടെന്നാണ് സൂചന. ഇക്കാര്യങ്ങൾ ഉൾപ്പെടെയുള്ള അന്വേഷണ പുരോഗതി സ്പെഷ്യൽ ഡയറക്ടറെ വിശദമായി ധരിപ്പിക്കുമെന്നാണ് വിവരം.
