ഇടുക്കി കഞ്ഞിക്കുഴി ഗ്രാമപഞ്ചായത്തിലെ വനിതാ ഓപ്പൺ ജിം നിർമാണത്തിൽ ക്രമക്കേട് നടന്നതായി ആരോപണം.പഴയരിക്കണ്ടം ഹോമിയോ ആശുപത്രി പരിസരത്ത് വനിതാ ഘടക പദ്ധതിയിൽ ഉൾപ്പെടുത്തി നിർമ്മിച്ച ജിം പദ്ധതിയിലാണ് അഴിമതി ആരോപണം ഉയരുന്നത്.10 ലക്ഷം രൂപ അനുവദിച്ച നിർമ്മാണ പ്രവൃത്തികൾക്ക് പകുതി തുക പോലും ഉപയോഗിച്ചിട്ടിലെന്നാണ് ആക്ഷേപം. ഗുണനിലവാരമില്ലാത്ത നിർമ്മാണ സാമഗ്രികളാൽ അശാസ്ത്രീയ നിർമ്മാണമാണ് നടത്തിയിരിക്കുന്നതെന്നും ആരോപണമുണ്ട്.നിർമാണത്തിലെ അപാകതകൾ ചൂണ്ടിക്കാട്ടിയതോടെ ഉദ്ഘാടനം കഴിഞ്ഞ ഉടൻ തന്നെ അറ്റകുറ്റപ്പണികൾ നടത്തി പ്രശ്നം മറയ്ക്കാൻ പഞ്ചായത്ത് ശ്രമിക്കുന്നുവെന്ന ആരോപണവും ഉയരുന്നു.2025-26 സാമ്പത്തിക വർഷത്തിലെ വനിത ഘടക പദ്ധതിയിൽ ഉൾപ്പെടുത്തിയാണ് കഞ്ഞിക്കുഴി ഗ്രാമപഞ്ചായത്ത് പഴയരിക്കണ്ടം ഹോമിയോ ആശുപത്രിയിൽ വനിതാ ഓപ്പൺ ജിം നിർമിച്ചത്.
ഈ മാസം 16 ന് ഇടുക്കി എംഎൽഎ റോയി കെ പൗലോസ് ജിമ്മിന്റെ ഉദ്ഘാടനം നിർവ്വഹിച്ചിരുന്നു. ഉദ്ഘാടനത്തിനെത്തിയ എംഎൽഎ യ്ക്കുപോലും നിർമ്മാണത്തിൽ അപാകതകൾ ഉള്ളതായി പ്രഥമ ദൃഷ്ടിയിൽ തന്നെ ബോധ്യപ്പെട്ടു. അധികൃതരോട് ഇക്കാര്യം ചൂണ്ടിക്കാട്ടുകയും ചെയ്തു. നിർമാണത്തിൽ ക്രമക്കേടുണ്ടെന്നും അശാസ്ത്രീയ നിർമ്മാണണമാണന്നും യുവമോർച്ചയടക്കം ആരോപണമുയർത്തിയതോടെ ക്രമക്കേട് മറയ്ക്കാൻ ദ്രുതഗതിയിൽ അറ്റകുറ്റപ്പണികൾ നടത്തുകയാണ് പഞ്ചായത്ത്. ക്രമക്കേടിൽ അന്വേഷണം ആവശ്യപ്പെട്ട് യുവമോർച്ച പഞ്ചായത്ത് സെക്രട്ടറിയ്ക്കടക്കം പരാതി നൽകി കഴിഞ്ഞു.
