തിരുവനന്തപുരം കഴക്കൂട്ടത്ത് എംഡിഎംഎ യുമായി സ്ഥിരം ലഹരി കച്ചവടക്കാരൻ പിടിയിൽ. തുമ്പ ആറാട്ടുവഴി സ്വദേശി ഷാരോൺ ജേക്കബ് ആണ് സിറ്റി ഡാൻസാഫിന്റെ പിടിയിലായത്. കേസിൽ ജാമ്യത്തിൽ ഇറങ്ങി വീണ്ടും ലഹരി കച്ചവടം നടത്തുന്നതിനിടയിലാണ് പിടികൂടിയത്.വീടുവളഞ്ഞാണ് സ്ഥിരം ലഹരി കച്ചവടക്കാരനായ ഷാരോൺ ജേക്കബിനെ ഡാൻസാഫ് സംഘം വലയിലാക്കിയത്. ഇയാളുടെ വീട്ടിൽ നിന്ന് 7 ഗ്രാം എംഡിഎംഎ കണ്ടെത്തി. കൂടാതെ ലഹരി ഉപയോഗിക്കുന്നതിനുള്ള ഇൻസുലിൻ സിറിഞ്ചുകളും കഞ്ചാവ് വലിക്കുന്നതിനുള്ള പ്രത്യേക ഉപകാരണവും സിറ്റി ഡാൻസാഫ് സംഘം കണ്ടെടുത്തു.
കഴിഞ്ഞ ഡിസംബറിൽ എം ഡി എംഎ യും ഗോൾഡൻ ഷാമ്പെയ്നും അടക്കം ഇയാൾ പിടിയിലായിരുന്നു.നിരവധി അടിപിടി കേസുകളിലും ഇയാൾ പ്രതിയാണ്. കേസിൽ ജാമ്യത്തിലിറങ്ങിയ ശേഷം വീണ്ടും ലഹരി കച്ചവടത്തിനിറങ്ങി.ഓപ്പറേഷൻ തൂഫാന്റെ ഭാഗമായി സ്ഥിരം കച്ചവടക്കാരെ നിരീക്ഷിച്ചു വരികയായിരുന്നു പോലീസ്. ഇതിനിടെ ഷാരോൺ വീട്ടിലെത്തിയതായി വിവരം ലഭിച്ച ഡാൻസാഫ് സംഘം വീട് വളഞ്ഞു ഷാരോണിനെ വലയിലാക്കി. ഇയാൾ കൂടുതൽ ലഹരി വസ്തുക്കൾ ശേഖരിച്ചതായി പോലീസിന് വിവരം ലഭിച്ചിട്ടുണ്ട്. കഴക്കൂട്ടം പൊലീസ് വിശദമായ പരിശോധന നടത്തുകയാണ്
