പ്രതി എബിൻ പോളിനെതിരെ യുഎപിഎ വകുപ്പുകൾ കൂടി ചുമത്തിയോതോട അന്വേഷണം എൻഐഎ ഏറ്റെടുക്കും. പ്രതി എബിൻ പോൾ കൂടുതൽ സ്ഥലങ്ങളിൽ ആക്രമണം നടത്താൻ ലക്ഷ്യമിട്ടതിന്റെ തെളിവുകളും അന്വേഷണത്തിൽ ലഭിച്ചു.
തീവ്രവാദ പ്രവർത്തനം, തീവ്രവാദ ആക്രമണങ്ങൾക്കുള്ള ഗൂഡാലോചന തുടങ്ങി യുഎപിഎ 16, 18 വകുപ്പുകളാണ് എബിൻ പോളിനെതിരെ അധികമായി ചുമത്തിയത്. അഞ്ച് ദിവസം നീണ്ട ചോദ്യം ചെയ്യലിലാണ് നിർണായക വിവരങ്ങൾ ലഭിച്ചത്. എബിൻ പോളിനെ നിയന്ത്രിച്ചിരുന്ന സംഘം ലക്ഷ്യമിട്ടത് വൻ ആക്രമണമെന്ന സൂചനകളാണ് പുറത്ത് വരുന്നത്. മൂവാറ്റുപുഴയിലും വാളകത്തും നടന്ന മൂന്ന് ആക്രമണങ്ങൾ പരീക്ഷണങ്ങളായിരുന്നു. ഇതിൽ വിജയിച്ചതോടെയാണ് സിനഗോഗിനെ ലക്ഷ്യമിടാൻ നിർദേശം നൽകിയത്. ആക്രമണത്തിന് മുന്നോടിയായി ലക്ഷ്യമിട്ട സ്ഥലങ്ങളുടെ ചിത്രങ്ങളടക്കം എബിൻ നിർദേശപ്രകാരം പകർത്തി അയച്ചു. ആക്രമണത്തിന് മുൻപ് എബിൻ പരിശീലനവും നടത്തി. ഇതിന്റെ ദൃശ്യങ്ങളടക്കം പൊലീസ് മൊബൈലിൽ നിന്ന് വീണ്ടെടുത്തു. ജില്ലയ്ക്ക് പുറത്തും മറ്റ് സംസ്ഥാനങ്ങളിലും എബിൻ പോൾ പോയതിന്റെ നിർണായക വിവരങ്ങളും അന്വേഷണത്തിൽ ലഭിച്ചു. ഇതോടെയാണ് ഗൂഡാലോചനയ്ക്ക് പിന്നിൽ കൂടുതൽ പേരുടെ പങ്ക് പൊലീസ് ഉറപ്പിക്കുന്നത്.
പുതിയ വകുപ്പുകൾ ചുമത്തി പൊലീസ് കോടതിയിൽ റിപ്പോർട്ട് നൽകി. സംസ്ഥാന പൊലീസിന്റെ തീവ്രവാദ വിരുദ്ധ സ്‌ക്വാഡിന്റെ നേതൃത്വത്തിലും അന്വേഷണം പുരോഗമിക്കുകയാണ്. എബിൻ പോളിന് ആക്രമണത്തിന് നിർദേശം നൽകിയ വിക്രം സിങ്, ബോസ് എന്നിവരെ കണ്ടെത്തണം. പ്രതിഫലമായി ഡോളറും ക്രിപ്‌റ്റോ കറൻസിയും ലഭിച്ചു. വിദേശത്ത് നിന്നുള്ള തീവ്രവാദ ഏജൻസികളുടെ പങ്കും പൊലീസ് സംശയിക്കുന്നു. എബിനെ കരുവാക്കി കൂടുതൽ സ്ഥലങ്ങളിൽ ശക്തമായ ആക്രമണങ്ങളായിരുന്നു സംഘത്തിന്റെ പദ്ധതിയെന്നാണ് സംശയം. എൻഐഎ ഇതിനോടകം പ്രാഥമിക വിവശഖേരണം നടത്തിയിട്ടുണ്ട്. വൈകാതെ കേസെടുത്ത് അന്വേഷണം ആരംഭിക്കും.
