നിർമ്മാണത്തിനായി ഏറ്റെടുക്കുന്ന വനഭൂമിക്ക് പകരമായി റവന്യൂ വകുപ്പ് കണ്ടെത്തിയതും വനഭൂമി തന്നെയെന്ന് വനം വകുപ്പിന്റെ വാദം. ഇതാണ് നേരിടുന്ന പുതിയ തടസ്സം. ശെന്തുരുണി വൈൽഡ് ലൈഫ് ഡിവിഷനിലെ കട്ടിളപ്പാറ സെറ്റിൽമെൻ്റിലാണ് 4.5336 ഹെക്ടർ ഭൂമി റവന്യു വകുപ്പ് പകരം കണ്ടെത്തിയത്.
ശബരിമലയിലേക്കുള്ള പൂജ സാമഗ്രികളും, അന്നദാനത്തിനായുള്ള ഉല്പന്നങ്ങളും പമ്പയിൽ നിന്നും സന്നിധാനത്തേക്ക് എത്തിക്കുന്നതിനാണ് റോപ്പ് വേ സംവിധാനത്തെക്കുറിച്ച് തിരുവിതാംകൂർ ദേവസ്വം ബോർഡ് ആലോചിച്ചത്. ട്രാക്ടറുകളിലുള്ള ചരക്ക് നീക്കം ഭക്തർക്ക് ഏറെ ബുദ്ധിമുട്ടുണ്ടാക്കുന്നത് പരിഗണിച്ചായിരുന്നു തീരുമാനം. 2015ൽ റോപ് വേ നിർമിക്കാൻ കരാർ കമ്പനിയുമായി തിരുവിതാംകൂർ ദേവസ്വം ബോർഡ് ഒപ്പുവച്ചു. പമ്പാ ഹിൽടോപ്പിൽ നിന്ന് ആരംഭിച്ച് മാളികപ്പുറം പോലീസ് ബാരക്കിന് സമീപം വരെ എത്തുന്ന രീതിയിൽ 2. 5 കിലോമീറ്ററോളം ദൈർഘ്യത്തിലാണ് റോപ്പ് വേ നിർമ്മിക്കാൻ തീരുമാനിച്ചത്. 2023 മെയിൽ സർവ്വേയും പൂർത്തിയായി. വനഭൂമിയിലൂടെ കടന്ന് പോകേണ്ടതിനാൽ റോപ്‌വേക്കായി എടുക്കുന്ന വനഭൂമിക്ക് പകരമായി ഭൂമി നൽകണമെന്നായിരുന്നു വനംവകുപ്പിന്റെ നിബന്ധന. ഇടുക്കി കഞ്ഞിക്കുഴിയിലും ചിന്നക്കനാൽ സിമൻ്റ് പാലം ഭാഗത്തും ഭൂമി കണ്ടെത്തിയെങ്കിലും എതിർപ്പിനെ തുടർന്ന് സ്ഥലം കൈമാറാൻ ആയില്ല. ഒടുവിൽ ശെന്തുരുണി വൈൽഡ് ലൈഫ് ഡിവിഷനിലെ കട്ടിളപ്പാറ സെറ്റിൽമെൻ്റിൽ നാലര ഹെക്ടർ സ്ഥലം കണ്ടെത്തി. കഴിഞ്ഞ സർക്കാരിൻ്റെ കാലത്ത്, അന്നത്തെ വനം റവന്യു, ദേവസ്വം മന്ത്രിമാരുടേയും ഉദ്യോഗസ്ഥരുടേയും സംയുക്ത യോഗത്തിൽ ഭൂമി വനം വകുപ്പിന് കൈമാറാൻ തീരുമാനിക്കുകയും ചെയ്തു. കേന്ദ്ര വനം വന്യജീവി ബോർഡ് നിയോഗിച്ച പ്രത്യേക സംഘം പദ്ധതി പ്രദേശം സന്ദർശിച്ച് റിപ്പോർട്ട് തയ്യാറാക്കി. ബോർഡിൻ്റെ അനുമതി ലഭ്യമായാലുടൻ ഭൂമി വനം വകുപ്പിന് കൈമാറി റോപ്പ് വേ നിർമ്മാണം ആരംഭിക്കാനായിരുന്നു നീക്കം. ദേവസ്വം ബോർഡിൻ്റെ ഈ നീക്കത്തിനാണ് ഇപ്പോൾ തിരിച്ചടിയായിരിക്കുന്നത്. മനുഷ്യ വന്യ ജീവി സംഘർഷം രൂക്ഷമായ വനാതിർത്തികളിൽ നിന്ന്, ജനങ്ങളെ മാറ്റിപ്പാർപ്പിക്കുന്നതിനായി ആവിഷ്‌ക്കരിച്ച നവകിരണം ആർ കെ ഡി പി പദ്ധതിയിൽ ഉൾപ്പെട്ട ഭൂമിയാണ് കട്ടിളപ്പാറയിലേതെന്നാണ് പുതിയ വിവരം. ഏറ്റെടുത്ത ഭൂമി വനംവകുപ്പ് സെക്ഷൻ ഫോർ നോട്ടിഫിക്കേഷൻ ചെയ്തിരുന്നില്ല.
