ഡയാലിസിസ് രോഗി ആശുപത്രിയിൽ പോയ സമയം നോക്കി വീട്ടിൽ മോഷണം.മലപ്പുറം കൊണ്ടോട്ടി സ്വദേശി കോഴിക്കോടൻ മൊയ്തീൻ കുട്ടിയുടെ വീട്ടിലാണ് മോഷണം നടന്നത്. നാലരപ്പവൻ സ്വർണ്ണാഭരണവും ഒന്നര ലക്ഷം രൂപയും കവർന്നു.
കൊണ്ടോട്ടി ബസ് സ്റ്റാൻറിന് സമീപം താമസിക്കുന്ന കോഴിക്കോടൻ മൊയ്തീൻ കുട്ടിയുടെ വീട്ടിലെ അലമാരയിൽ സൂക്ഷിച്ച നാലര പവൻ സ്വർണ്ണാഭരണവും ഒന്നര ലക്ഷം രൂപയുമാണ് കവർന്നത്.മൊയ്തീൻ കുട്ടി ഡയാലിസിസ് ചെയ്യാനായി ഒന്നിടവിട്ട ദിവസങ്ങളിൽ മുക്കം KMCT ആശുപത്രിയിൽ പോവാറുണ്ട്.കഴിഞ്ഞ ദിവസം വൈകുന്നേരം ആശുപത്രിയിൽ പോയി മടങ്ങി എത്തുമ്പോഴാണ് വീടിന്റെ മുൻവശത്തെ ഗ്രിൽ തകർത്ത നിലയിൽ കണ്ടെത്തിയത്.
സമാനമായ രീതിയിൽ വീട്ടുകാരില്ലാത്ത സമീപത്തെ മറ്റൊരു വീട്ടിലും മോഷണ ശ്രമം നടത്തിയിട്ടുണ്ട്. വീടിന്റെ അടുക്കള ഭാഗത്തെ ചെറിയ വെൻ്റിലേഷൻ തകർത്ത് അകത്ത് കടന്നായിരുന്നു മോഷണ ശ്രമം. അലമാര പൊളിച്ച് അതിലുണ്ടായിരുന്ന സാധനങ്ങൾ മുഴുവൻവലിച്ചു വാരിയിട്ട നിലയിലായിരുന്നു. എന്നാൽ ഇവിടെ നിന്നും ഒന്നും നഷ്ടപ്പെട്ടില്ല. സംഭവത്തിൽ കൊണ്ടോട്ടി പോലീസ് അന്വേഷണം ആരംഭിച്ചു.
