ദുബായിൽ നിന്ന് ടെൽ അവീവിലേക്ക് പോയ ഫ്ലൈ ദുബായ് വിമാനം സൗദി അറേബ്യയിലേക്ക് തിരിച്ചുവിട്ട സംഭവത്തിൽ ആശയക്കുഴപ്പം തുടരുന്നു. വിമാനം ഹൈജാക്ക് ചെയ്തെന്ന റിപ്പോർട്ടുകൾ ഇസ്രയേൽ തള്ളി. വിമാനം വഴിതിരിച്ചുവിട്ടത് ഹൈജാക്കിംഗ് മൂലമാണെന്ന് കരുതുന്നില്ലെന്ന് ഇസ്രയേൽ പ്രധാനമന്ത്രിയുടെ ഓഫീസ് വ്യക്തമാക്കി.
ദുബായ്-ബെൻ ഗുരിയോൺ സർവീസ് നടത്തിയ ബോയിംഗ് 737 മാക്സ് 8 വിമാനമാണ് അടിയന്തരമായി ഗതി മാറ്റിയത്. വിമാനം സൗദിയിലെ തബൂക്ക് വിമാനത്താവളത്തിന് സമീപം ലാൻഡ് ചെയ്തതായാണ് വിവരം.ഹൈജാക്കിംഗ് സൂചിപ്പിക്കുന്ന 7500 എന്ന അടിയന്തര കോഡ് വിമാനത്തിൽ നിന്ന് കൈമാറിയതായി ഇസ്രയേലി ആർമി റേഡിയോ റിപ്പോർട്ട് ചെയ്തിരുന്നു. ഇതോടെയാണ് വിമാനം റാഞ്ചിയെന്ന റിപ്പോർട്ടുകൾ പുറത്തുവന്നത്.
സംഭവത്തിൽ പ്രധാനമന്ത്രി ബെഞ്ചമിൻ നെതന്യാഹു പ്രതിരോധ ഉദ്യോഗസ്ഥരുമായി അടിയന്തര സുരക്ഷാ യോഗം നടത്തിയതായും ഇസ്രയേലി മാധ്യമങ്ങൾ റിപ്പോർട്ട് ചെയ്തു. സംഭവ മേഖലയിലേക്ക് ഇസ്രയേൽ യുദ്ധവിമാനങ്ങൾ അയച്ചതായും റിപ്പോർട്ടുകളുണ്ട്.വിമാനം ലാൻഡ് ചെയ്തതിന് പിന്നാലെയുള്ള പരിശോധനകൾ പൂർത്തിയായാൽ മാത്രമേ സംഭവത്തിന്റെ യഥാർഥ കാരണം വ്യക്തമാകൂവെന്നാണ് സുരക്ഷാ വൃത്തങ്ങളുടെ പ്രതികരണം.
