സ്ത്രീകൾക്ക് കെഎസ്ആർടിസി ബസുകളിൽ സൗജന്യ യാത്ര ഒരുക്കുന്നതിൽ പ്രതിഷേധിച്ച് സ്വകാര്യ ബസിൽ പുരുഷന്മാർക്ക് സൗജന്യ യാത്ര. എറണാകുളം ജില്ലയിലെ ആലുവ – മാഞ്ഞാലി റൂട്ടിലെ സ്വകാര്യ ബസുടമയാണ് വേറിട്ട പ്രതിഷേധവുമായി രംഗത്തെത്തിയത്. ഇന്നൊരു ദിവസത്തേക്ക് ബസിൽ യാത്ര ചെയ്യുന്ന പുരുഷന്മാർക്ക് പൂർണമായും ടിക്കറ്റ് ഒഴിവാക്കിയാണ് പ്രതിഷേധം.
മാഞ്ഞാലി – ആലുവ റൂട്ടിൽ സർവീസ് നടത്തുന്ന ലിറ്റിൽ ഫ്ലവർ ബസിലാണ് പ്രതിഷേധ സൂചകമായി പുരുഷന്മാർക്ക് സമ്പൂർണ സൗജന്യ യാത്ര നൽകിയത്. രാവിലെ മുതൽ രാത്രി വരെയുള്ള ഇന്നത്തെ ഏഴ് സർവീസുകളിലും, ലിറ്റിൽ ഫ്ലവർ ബസിൽ യാത്ര ചെയ്യുന്ന പുരുഷന്മാർക്ക് ടിക്കറ്റ് വേണ്ട. പ്രിയദർശിനി പദ്ധതി സ്വകാര്യ ബസുടമകൾക്ക് വൻ പ്രതിസന്ധി ഉണ്ടാക്കുമെന്നാണ് ബസുടമയായ ഡേവിസ് ചൂണ്ടിക്കാട്ടുന്നത്.
പ്രിയദർശിനി പദ്ധതി ആരംഭിച്ചിട്ടും തങ്ങളുടെ സ്വകാര്യ ബസിൽ യാത്ര ചെയ്യുന്ന സ്ത്രീകൾക്ക് ടിക്കറ്റിനൊപ്പം ബസ് ജീവനക്കാർ മധുരം വിതരണം ചെയ്തു. സ്വകാര്യ ബസ് വ്യവസായ മേഖലയെ പിടിച്ച് നിർത്താൻ ബജറ്റിൽ എങ്കിലും കരുതൽ ഉണ്ടാകുമെന്ന പ്രതീക്ഷയിലാണ് ബസുടമകളും തൊഴിലാളികളും.
