വി ഡി സതീശന് എറണാകുളം റെയിൽവേ സ്റ്റേഷനിൽ പ്രവർത്തകരുടെ ആവേശകരമായ വരവേൽപ്പ്. നൂറുകണക്കിന് കോൺഗ്രസ് പ്രവർത്തകർ ‘മുഖ്യമന്ത്രി’ മുദ്രാവാക്യങ്ങളോടെയാണ് അദ്ദേഹത്തെ സ്വീകരിച്ചത്. ഡിസിസി അധ്യക്ഷൻ മുഹമ്മദ് ഷിയാസ് ഉൾപ്പെടെയുള്ള നേതാക്കളും കെഎസ്യു പ്രവർത്തകരും സ്വീകരണത്തിനായി സ്റ്റേഷനിൽ എത്തിയിരുന്നു.
തിരുവനന്തപുരത്തെ വിജയാഘോഷങ്ങൾക്ക് ശേഷമാണ് വി ഡി സതീശൻ എറണാകുളത്ത് എത്തിയത്.അതേസമയം എറണാകുളം ഡിസിസിക്ക് മുന്നിൽ കെ സി വേണുഗോപാലിന് അഭിനന്ദനം അറിയിച് ഫ്ലക്സ് ബോർഡ് ഉയർന്നു. വി ഡി സതീശൻ്റെ സ്വീകരണ പരിപാടി ഡിസിസിയിൽ എത്താനിരിക്കെയാണ് ഫ്ലക്സ് ഉയർന്നത്. ഇതിനിടെ മുഖ്യമന്ത്രി ചർച്ചകളിലേക്ക് ഔദ്യോഗികമായി കടന്ന് കോൺഗ്രസ്. എഐസിസി അധ്യക്ഷൻ മല്ലികാർജുൻ ഖർഗെയും ലോക്സഭ പ്രതിപക്ഷ നേതാവ് രാഹുൽ ഗാന്ധിയും ചർച്ച നടത്തി.മല്ലികാർജുൻ ഖർഗെയുടെ വസതിയിലായിരുന്നു ചർച്ച.
