പാർട്ടിയിലെ പീഡന പരാതികളും സ്ത്രീ അധിക്ഷേപ പരാതികളും അന്വേഷിക്കാൻ സിപിഐഎം രൂപീകരിച്ച ആഭ്യന്തര പ്രശ്നപരിഹാര കമ്മിറ്റിയിലും അട്ടിമറി. പുറത്തുനിന്നുള്ള നിയമവിദഗ്ധ എന്ന പേരിൽ ആരോപണ വിധേയയായ സി പി ഐ എം നേതാവ് ഗീനാകുമാരിയെ ഉൾപ്പെടുത്തി. പാർട്ടിക്കുള്ളിൽ നിന്ന് പീഡന വാർത്തകൾ പുറത്തുവരാതിരിക്കാനാണ് ടി.എൻ സീമയെ അധ്യക്ഷയാക്കി ഐ.സി.സി രൂപീകരിച്ചത്.
പാലക്കാട് ജില്ലാ സെക്രട്ടറിയായിരുന്ന ഇ.എൻ സുരേഷ് ബാബുവിനെതിരായ യുവതിയുടെ പരാതി പുറത്തായതിന് പിന്നാലെയാണ് പാർട്ടിയുടെ ജാഗ്രത നീക്കം. കേന്ദ്ര നേതൃത്വത്തിന്റെ കടുത്ത നിലപാടിനെ തുടർന്ന് നേരത്തേ ഉണ്ടായിരുന്ന ഐ.സി.സി പുനസംഘടിപ്പിച്ചു. ടി.എൻ സീമ അധ്യക്ഷയായ കമ്മിറ്റിയിൽ പി കെ സൈനബ, എൻ ചന്ദ്രൻ, എ വിജയകുമാർ എന്നിവരും അംഗങ്ങളാണ്. ഐ.സി.സികളിൽ നിയമ വിദഗ്ധയായി ഉൾപ്പെടുത്തേണ്ടത് സംഘടനയ്ക്കോ സ്ഥാപനങ്ങൾക്കോ പുറത്ത് നിന്നുള്ളവരാകണം എന്നതാണ് അട്ടിമറിച്ചത്. അഡ്വ. ഗീനാകുമാരി സജീവ സിപിഐഎം പ്രവർത്തകയും, എസ്എഫ്ഐ മുൻ അഖിലേന്ത്യ നേതാവുമാണ്. പബ്ലിക് പ്രോസിക്യൂട്ടർ എന്ന നിലയിൽ പലവിധ വിവാദങ്ങളിലും ഗീനാകുമാരി ഉൾപ്പെട്ടിട്ടുണ്ട്. ഇ ഡി ഉദ്യോഗസ്ഥരെ ആക്രമിച്ച കേസിൽ പ്രതികൾക്ക് ജാമ്യം ലഭിക്കാൻ കാരണമായത് പൊലീസ് നിലപാടിന് വിരുദ്ധമായ നിലപാട് പബ്ലിക് പ്രോസിക്യൂട്ടർ എന്ന നിലയിൽ ഗീനാകുമാരി കോടതിയിൽ സ്വീകരിച്ചതിനാലാണ്. ഇതിന് പിന്നാലെ പ്രോസിക്യൂട്ടർ സ്ഥാനത്തുനിന്ന് ഗീനാകുമാരിയെ നീക്കം ചെയ്തിരുന്നു. ഐസിസി സജീവമാകുന്നതോടെ പീഡന പരാതികൾ ഇനി പാർട്ടി ഘടകങ്ങൾ അന്വേഷിക്കില്ല. സംസ്ഥാനതലത്തിൽ ഒറ്റ ആഭ്യന്തര പ്രശ്നപരിഹാര സെൽ എന്ന രീതിയിലാണ് രൂപീകരിച്ചിരിക്കുന്നത്. പാർട്ടിയിലെ സ്ത്രീ അധിക്ഷേപ പരാതികൾ പുറത്തുവരാതിരിക്കാൻ കൂടിയാണ് തീരുമാനം.
