കേരളത്തിലെ ഏറ്റവും പ്രായം കുറഞ്ഞ അവയവദാതാവായ ആലിൻ ഷെറിൻ എബ്രഹാമിന് ആദരവുമായി സപ്ലൈകോ. ആലിന്റെ സ്മരണയ്ക്കായി സപ്ലൈകോ നോട്ടുബുക്കുകൾ പുറത്തിറക്കുന്നു. സപ്ലൈകോ ആലിൻ ബ്രാൻഡിൽ ഇറക്കുന്ന നോട്ടുബുക്കുകളുടെ ഔദ്യോഗിക പ്രകാശനം നാളെ നടക്കും. ഉച്ചയ്ക്ക് എറണാകുളം ഗസ്റ്റ് ഹൗസിലാണ് പ്രകാശന ചടങ്ങ്. ഭക്ഷ്യ പൊതുവിതരണ വകുപ്പ് മന്ത്രി അനൂപ് ജേക്കബ് ഉച്ചയ്ക്ക് 1.30ന് പ്രകാശനം നടത്തും. മേയർ മിനിമോൾ വി കെ അധ്യക്ഷയാകുന്ന ചടങ്ങിൽ ആലിന്റെ മാതാപിതാക്കളായ അരുൺ എബ്രഹാം, ഷെറിൻ ആൻ ജോൺ എന്നിവരെ ആദരിക്കും.
നോട്ടുബുക്കുകളുടെ കവർ ഡിസൈനിങ് പൂർത്തീകരിച്ച തേവര സേക്രഡ് ഹാർട്ട് കോളജിലെ വിദ്യാർഥികളെയും യോഗത്തിൽ അനുമോദിക്കും. ടി ജെ വിനോദ് എംഎൽഎ, ഹൈബി ഈഡൻ എംപി, കോർപറേഷൻ കൗൺസിലർ അഗസ്റ്റിൻ സെബാസ്റ്റ്യൻ, സപ്ലൈകോ മാനേജിംഗ് ഡയറക്ടർ ജയകൃഷ്ണൻ വി എം, ജനറൽ മാനേജർ എം യു ബിജു തുടങ്ങിയവർ ചടങ്ങിൽ പങ്കെടുക്കും.
പത്തനംതിട്ട മല്ലപ്പള്ളി സ്വദേശികളായ അരുൺ- ഷെറിൻ ദമ്പതിമാരുടെ മകൾ ആലിൻ ഷെറിൻ എബ്രഹാം വാഹനാപകടത്തിലാണ് മരിച്ചത്. പത്ത് മാസം മാത്രമായിരുന്നു കുഞ്ഞിന്റെ പ്രായം. കുഞ്ഞിന്റെ ഹൃദയ വാൽവ്, കരൾ, വൃക്ക, കണ്ണുകൾ എന്നിവ ദാനം ചെയ്തത് വഴി നാല് പേർക്കാണ് പുതുജീവനേകിയത്.
