108 ആംബുലൻസിന്റെ ടെൻഡർ നടപടികളിൽ മാറ്റം വരുത്താൻ ആരോഗ്യ വകുപ്പ്. നഴ്സിംഗ് യോഗ്യതയുള്ളവർക്ക് മാത്രമായിരിക്കും എമർജൻസി മെഡിക്കൽ ടെക്നീഷ്യൻ തസ്തികയിൽ നിയമനം നൽകുക. ആരോഗ്യമന്ത്രി കെ മുരളീധരൻ ജീവനക്കാരുമായും മെഡിക്കൽ സർവീസസ് കോർപ്പറേഷൻ അധികൃതരുമായും ജി വി കെ അധികൃതരുമായും നടത്തിയ ചർച്ചയിലാണ് തീരുമാനം.
ബിഗ് ടിവിയാണ് ആദ്യം വാർത്ത പുറത്തുവിട്ടത്. എമർജൻസി മെഡിക്കൽ ടെക്നീഷ്യൻ തസ്തികയിലേക്ക് ബി എസ് സി നഴ്സിംഗ്, ജനറൽ നഴ്സിംഗ് യോഗ്യത ആവശ്യമില്ലെന്നും ഏതെങ്കിലും വിഷയത്തിൽ പ്ലസ് ടു, ഇഎംടി കോഴ്സ് പാസായ ആർക്കും നിയമനം നൽകാം എന്നുമായിരുന്നു എൽഡിഎഫ് സർക്കാർ തയ്യാറാക്കിയ ടെൻഡറിലെ വ്യവസ്ഥ. ബിഗ് ടിവിയിൽ വാർത്ത വന്നതിന് പിന്നാലെ വിഷയത്തിൽ ആരോഗ്യമന്ത്രി ഇടപെട്ടു. തൊട്ടുപിന്നാലെ ജീവനക്കാർ സമര പ്രഖ്യാപനം നടത്തി. ഇതോടെയാണ് ആരോഗ്യവകുപ്പ് ചർച്ചയ്ക്ക് വിളിച്ചത്. ഇഎംടി നിയമനത്തിന് നഴ്സിംഗ് യോഗ്യത മാത്രം മതിയെന്ന സമരാനുകൂലികളുടെ ആവശ്യം മന്ത്രി അംഗീകരിച്ചു. യോഗ്യതയുള്ള 40 വയസിന് മേൽ പ്രായമുള്ളവരെ ഫിറ്റ്നസിൻ്റെ അടിസ്ഥാനത്തിൽ നിയമിക്കാമെന്നും മന്ത്രി നിർദേശം നൽകി. ചർച്ചയിലെ തീരുമാനങ്ങൾ എഴുതി നൽകണമെന്ന് കമ്പനിയോട് ജീവനക്കാർ ആവശ്യപ്പെട്ടു.
