ഔദ്യോഗിക യാത്രകൾക്കിടെ കൂടുതൽ അകമ്പടി വാഹനങ്ങൾ ഉൾപ്പെടുത്തിയതിൽ ഡിസിപിയോട് അതൃപ്തി അറിയിച്ച് മുഖ്യമന്ത്രി വി.ഡി. സതീശൻ. ഔദ്യോഗിക വാഹനത്തിന് മുന്നിൽ അധിക പൊലീസ് വാഹനങ്ങൾ വിന്യസിക്കേണ്ടതില്ലെന്ന് മുഖ്യമന്ത്രി കർശന നിർദേശം നൽകി.
ഇന്ന് രാവിലെ യാത്രയ്ക്കിടെ മുഖ്യമന്ത്രിയുടെ പൈലറ്റ് വാഹനത്തിന് മുന്നിൽ മ്യൂസിയം എസ്.എച്ച്.ഒയുടെ വാഹനം കൂടി സഞ്ചരിക്കുന്നത് ശ്രദ്ധയിൽപ്പെട്ടതോടെയാണ് നിർദേശം. വി.ഐ.പി റൂട്ട് ക്ലിയറൻസിന്റെ ഭാഗമായാണ് വാഹനം മുന്നിൽ പോയതെന്നാണ് പൊലീസ് വിശദീകരണം.
അതേസമയം, മുഖ്യമന്ത്രിക്കും മന്ത്രിമാർക്കുമെതിരെ യുവമോർച്ചയുടെ പ്രതിഷേധം ശക്തമായ സാഹചര്യത്തിൽ തലസ്ഥാനത്ത് പൊലീസ് സുരക്ഷ വർധിപ്പിച്ചിട്ടുണ്ട്. പൊതുപരിപാടികളിലും യാത്രകളിലും കർശന സുരക്ഷയാണ് ഏർപ്പെടുത്തിയിരിക്കുന്നത്. വാഹനവ്യൂഹം തടസ്സപ്പെടുത്തുന്ന തരത്തിലുള്ള പ്രതിഷേധങ്ങൾ ഒഴിവാക്കാൻ മുൻകരുതലുകൾ സ്വീകരിച്ചിട്ടുണ്ട്. സുരക്ഷ ശക്തമാക്കാൻ ഇന്റലിജൻസ് എഡിജിപി ജില്ലാ പൊലീസ് മേധാവിമാർക്ക് നേരത്തെ നിർദേശം നൽകിയിരുന്നു.
