നടിയെ ആക്രമിച്ച കേസ്; ധനസമാഹരണത്തിനൊരുങ്ങി അവൾക്കൊപ്പം ട്രസ്റ്റ്

കൊച്ചിയിൽ നടിയെ ആക്രമിച്ച കേസിൽ തുടർനടപടികൾക്ക് ധനസമാഹരണവുമായി അവൾക്കൊപ്പം ട്രസ്റ്റ്. നിയമപോരാട്ടത്തിന് ധനസഹായം തേടിയാണ് അവൾക്കൊപ്പം ലീഗൽ സപ്പോർട്ട് ട്രസ്റ്റിന്റെ പേരിൽ അഭ്യർഥന നടത്തിയത്. കേസിലെ എട്ടാം പ്രതിയായിരുന്ന ദിലീപ് ഉൾപ്പെടെയുള്ള നാല് പ്രതികളെ വെറുതെവിട്ട വിചാരണക്കോടതി വിധിക്കെതിരെ അതിജീവിത ഹൈക്കോടതിയിൽ ഉടൻ അപ്പീൽ നൽകുമെന്ന് ട്രസ്റ്റ് വ്യക്തമാക്കി. ആക്രമിക്കപ്പെട്ട ദൃശ്യങ്ങൾ അടങ്ങിയ മെമ്മറി കാർഡ് ചോർത്തിയ കേസിലും അതിജീവിത കോടതിയെ സമീപിക്കുമെന്ന് ട്രസ്റ്റ് പറഞ്ഞു. അതിജീവിതയ്ക്കായി മുതിർന്ന സുപ്രിംകോടതി അഭിഭാഷക വൃന്ദ ഗ്രോവർ ആണ് ഹാജരാകുന്നത്. അവൾക്കൊപ്പം ലീഗൽ സപ്പോർട്ട് ട്രസ്റ്റിന്റെ സഹായ അഭ്യർത്ഥന വിമൻ ഇൻ സിനിമാ കളക്ടീവ് ഉൾപ്പെടെയുള്ളവർ സമൂഹമാധ്യമങ്ങളിൽ പങ്കുവച്ചിട്ടുണ്ട്.