തൃശ്ശൂർ കുര്യച്ചിറയിൽ ദേശായി ഹോംസിന്റെ ഫ്ലാറ്റ് നിർമാണത്തിനിടെ സമീപത്തെ വീടുകൾക്ക് കേടുപാടുകൾ സംഭവിച്ചതായി നാട്ടുകാരുടെ പരാതി. പുതിയ ടവറിന്റെ നിർമാണ പ്രവർത്തനത്തെ തുടർന്നാണ് വീടുകൾ വിണ്ടുകീറുകയും ഒരു വീട്ടിന്റെ ഭാഗം പൂർണമായി ഇടിഞ്ഞുതാഴുകയും ചെയ്തതെന്ന് ആരോപണം.മൂന്ന് ദിവസം മുൻപാണ് സമീപത്തെ ഒരു വീട്ടിന്റെ ഭാഗം ഇടിഞ്ഞുവീണത്. അപകടസാധ്യതയെ തുടർന്ന് വീട്ടുകാരെ ഫ്ലാറ്റ് അധികൃതർ രഹസ്യമായി മാറ്റി പാർപ്പിച്ചെന്നും നാട്ടുകാർ ആരോപിക്കുന്നു. നിർമാണം ആരംഭിച്ചതു മുതൽ പ്രദേശത്ത് ചെറുതും വലുതുമായ പ്രതിഷേധങ്ങളും പരാതികളും ഉയർന്നിരുന്നു.
വീടുകൾക്ക് അകത്തുപോലും വലിയ വിള്ളലുകൾ രൂപപ്പെട്ടതായും എപ്പോൾ വേണമെങ്കിലും കൂടുതൽ അപകടം സംഭവിക്കാമെന്ന ഭീതിയിലാണെന്നും പ്രദേശവാസികൾ പറയുന്നു. പരാതിയുമായി കോർപ്പറേഷനിലെത്തിയ നാട്ടുകാരെ മേയർ കാണാൻ തയ്യാറായില്ലെന്ന ആരോപണവും ഉയരുന്നുണ്ട്.അതേസമയം, സ്ഥലത്തെത്തിയ എൽഡിഎഫ് കൗൺസിലർമാർ രേഖകൾ പരിശോധിക്കുമെന്ന് അറിയിച്ചു. വിഷയത്തിൽ ബിജെപിയും സമരമാരംഭിച്ചിട്ടുണ്ട്.
