തിരുവനന്തപുരം വെമ്പായത്തെ ഹാപ്പിലാൻഡ് അമ്യൂസ്മെൻറ് പാർക്കിൽ റൈഡ് പൊട്ടിവീണ് അപകടം. കുട്ടികൾ അടക്കം അഞ്ച് പേർക്ക് പരിക്കേറ്റു. ഇവരെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. സംഭവത്തിൽ വെഞ്ഞാറമൂട് പൊലീസ് കേസെടുത്തു.ഉച്ചയ്ക്കായിരുന്നു അപകടം. 14 പേർ റൈഡിലുണ്ടായിരിക്കെയാണ് ജയന്റ് വീൽ ഒരു വശത്തേക്ക് ചരിഞ്ഞ് താഴേക്ക് പതിച്ചത്. ഉയരത്തിലേക്ക് ഉയർന്ന സമയത്ത് വെൽഡിങ് ഭാഗം പൊട്ടിയതാണ് അപകടത്തിന് കാരണമായതെന്നാണ് പ്രാഥമിക നിഗമനം.
നാഗർകോവിൽ സ്വദേശികളായ ഒരു കുടുംബത്തിലെ 5 പേർക്കാണ് പരിക്കേറ്റത്. മനോരതി, സീമണി,മാലിനി, ശ്യാം ഡാനിയേൽ,റോസ് എന്നിവരാണ് പരിക്കേറ്റവർ. ആരുടെയും പരിക്ക് ഗുരുതരമല്ല. ഗുരുതര സുരക്ഷാ വീഴ്ചയാണ് പാർക്കിൽ ഉണ്ടായതെന്നും അപകടസ്ഥലത്ത് നിന്ന് ആശുപത്രിയിലേക്ക് എത്തിക്കാൻ ആംബുലൻസ് ഉണ്ടായിരുന്നില്ലെന്നും നാട്ടുകാർ പറഞ്ഞു.സുരക്ഷാവീഴ്ചയിൽ നടപടി വേണമെന്ന് സ്ഥലം എം എൽ എ ജിആർ അനിൽ ആവശ്യപ്പെട്ടു.അപകടം നടന്ന് മണിക്കൂറുകളായിട്ടും പാർക്കിന്റെ പ്രവർത്തനം നിർത്തിവെച്ചില്ലെന്നും ആരോപണമുണ്ട്.മുമ്പും ഹാപ്പി ലാൻഡ് അമ്യൂസ്മെൻറ് പാർക്കിൽ അപകടങ്ങൾ ഉണ്ടായിട്ടുണ്ട്. കൃത്യമായ സുരക്ഷാ പരിശോധന ഇല്ലാതെയാണ് പാർക്കിന്റെ ലൈസൻസ് പുതുക്കിയത് എന്നാണ് ആക്ഷേപം.
അപകടത്തിൽ ജില്ലാ കളക്ടറും റിപ്പോർട്ട് ആവശ്യപ്പെട്ടിട്ടുണ്ട്
