ഇടിമിന്നലോടെ ശക്തമായ മഴയ്ക്ക് സാധ്യത; 8 ജില്ലകളിൽ നാളെ യെല്ലോ അലേർട്ട്

സംസ്ഥാനത്ത് മഴ മുന്നറിയിപ്പിൽ മാറ്റം.അടുത്ത നാല് ദിവസം സംസ്ഥാനത്ത് ഇടിമിന്നലോട് കൂടിയ ശക്തമായ മഴ ലഭിക്കും.കഴിഞ്ഞ ദിവസങ്ങളിൽ ഉയർന്ന അൾട്രാവയലറ്റ് സൂചിക അനുഭവപ്പെട്ടതിനാൽ ഇടിമിന്നലിനും ശക്തമായ കാറ്റിനും സാധ്യതയുണ്ട്. നാലുദിവസം സംസ്ഥാനത്ത് ഭേദപ്പെട്ട രീതിയിൽ മഴ ലഭിക്കും.ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, കോഴിക്കോട്, വയനാട്, കണ്ണൂര്‍ ജില്ലകളിൽ നാളെ യെല്ലോ അലേർട്ട് ആണ് പ്രഖ്യാപിച്ചിട്ടുള്ളത്.മഴ ലഭിച്ചതോടെ പാലക്കാട് ജില്ലയിൽ താപനിലക്ക് കുറവുണ്ട്.ഇന്ന് ജില്ലയിൽ 37.9°c ണ് രേഖപ്പെടുത്തിയത്.20 ദിവസങ്ങൾക്കുള്ളിൽ ആദ്യമാണ് താപനില 38 ഡിഗ്രിക്ക് താഴെ എത്തുന്നത്.പുനലൂരും 38 ഡിഗ്രി സെൽഷ്യസാണ്.അതേസമയം, കേരളത്തിൽ പല സ്ഥലങ്ങളിലും ഇന്നും ഉയർന്ന അൾട്രാവയലറ്റ് സൂചികയാണ് രേഖപ്പെടുത്തിയത്. കോന്നി, ചങ്ങനാശ്ശേരി, മൂന്നാര്‍, ചെങ്ങന്നൂര്‍ എന്നിവിടങ്ങളിലാണ് യുവി ഇൻഡക്സ് ഏറ്റവും ഉയര്‍ന്നത്.പകൽ 10 മണി മുതൽ 3 മണി വരെയുള്ള സമയങ്ങളിലാണ് ഉയർന്ന അൾട്രാവയലറ്റ് സൂചിക രേഖപ്പെടുത്തപ്പെടുന്നത്.ഈ സമയങ്ങൾ പൊതുജനങ്ങൾ ജാഗ്രത പാലിക്കണമെന്നും ആരോഗ്യ വിഭാഗം മുന്നറിയിപ്പ് നൽകിയിട്ടുണ്ട്.