പി എം ശ്രീ പദ്ധതിയിലെ നിയമസാധുതകൾ പരിശോധിക്കുന്നതിനും തുടർനടപടികൾ ചർച്ച ചെയ്ത് റിപ്പോർട്ട് നൽകുന്നതിനുമായി നിയോഗിച്ച മന്ത്രിതല ഉപസമിതി ഇന്ന് വീണ്ടും യോഗം ചേരും. നിയമസഭാ സമ്മേളനത്തിന് ശേഷം പൊതുവിദ്യാഭ്യാസ വകുപ്പ് മന്ത്രി എൻ.ഷംസുദ്ദീന്റെ അധ്യക്ഷതയിലാണ് യോഗം ചേരുക. പദ്ധതിയുമായി ബന്ധപ്പെട്ട വിശദമായ വിവരങ്ങൾ തേടാൻ കഴിഞ്ഞയാഴ്ച ധാരണയായിരുന്നു. സംസ്ഥാനത്തിൻ്റെ താത്പര്യങ്ങൾക്കനുസൃതമായ റിപ്പോർട്ട് തയ്യാറാക്കുകയാണ് ഉപസമിതിയുടെ ലക്ഷ്യം.
തുടർനടപടികൾക്കായി കേന്ദ്രത്തെ സമീപിക്കുമ്പോൾ ശ്രദ്ധിക്കേണ്ട സിലബസ് അടക്കമുള്ള വിഷയങ്ങളും ഇന്ന് വീണ്ടും ചർച്ചയാകും. ഒരു മാസത്തിനകം റിപ്പോർട്ട് സമർപ്പിക്കണമെന്ന നിർദ്ദേശമുള്ളതിനാൽ നടപടികൾ വേഗത്തിലാക്കാനാണ് ഉപസമിതിയുടെ തീരുമാനം. വിദ്യാഭ്യാസ മന്ത്രി എൻ ഷംസുദ്ദീൻ കൺവീനറായ ഉപസമിതിയിൽ മന്ത്രിമാരായ റോജി എം ജോൺ, എം ലിജു, പി.സി വിഷ്ണുനാഥ് എന്നിവരാണ് മറ്റ് അംഗങ്ങൾ.
