കണ്ണൂർ പിലാത്തറയിൽ കാർ തട്ടിയെടുത്ത് ഒന്നരക്കോടിയോളം രൂപയുടെ സ്വർണവും പണവും കവർന്ന കേസിൽ ക്വട്ടേഷൻ സംഘത്തിലെ ഒരാൾ കൂടി അറസ്റ്റിൽ. സംഭവത്തിൽ നേരിട്ട് പങ്കെടുത്ത അശ്വന്ത് വി എന്നയാളെയാണ് പോലീസ് മാലൂരിലെ ഒളിത്താവളത്തിൽ നിന്ന് പിടികൂടിയത്.
ജൂൺ രണ്ടിനാണ് മഹാരാഷ്ട്ര സ്വദേശികൾ സഞ്ചരിച്ച കാർ ഒരു സംഘം ആക്രമിച്ച് രഹസ്യ അറയിൽ സൂക്ഷിച്ചിരുന്ന സ്വർണവും പണവും കവർന്നത്. സംഭവത്തിൽ നേരത്തെ ഒരാളെ അറസ്റ്റ് ചെയ്തിരുന്നു. ഇയാളെ ചോദ്യം ചെയ്തതിൽ നിന്നാണ് അശ്വന്തിന്റെ പങ്കാളിത്തത്തെക്കുറിച്ചുള്ള നിർണായക വിവരങ്ങൾ പൊലീസിന് ലഭിച്ചത്.
തുടർന്ന് പ്രത്യേക അന്വേഷണ സംഘം നടത്തിയ അന്വേഷണത്തിനൊടുവിലാണ് ഒളിവിൽ കഴിഞ്ഞിരുന്ന അശ്വന്തിനെ മാലൂരിലെ ഒളിസങ്കേതത്തിൽ നിന്ന് പിടികൂടിയത്. കണ്ണൂർ റൂറൽ എസ്.പി.യുടെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്.അറസ്റ്റിലായ അശ്വന്തിനെ വിശദമായി ചോദ്യം ചെയ്ത് വരികയാണ്. കവർച്ചയിൽ പങ്കെടുത്ത മറ്റ് പ്രതികളെയും കവർന്നെടുത്ത സ്വർണവും പണവും കണ്ടെത്താനുള്ള അന്വേഷണം തുടരുകയാണെന്ന് പൊലീസ് അറിയിച്ചു.
