കണ്ണൂർ പിലാത്തറയിൽ കാർ തട്ടിയെടുത്ത് സ്വർണവും പണവും കവർന്ന കേസിൽ നേരിട്ട് പങ്കെടുത്ത ഒരാൾ കൂടി പൊലീസ് പിടിയിലായി. ക്വട്ടേഷൻ സംഘത്തിലെ അംഗമായ ചെറുകുന്ന് സ്വദേശി ജിജിലിനെയാണ് കണ്ണൂരിൽ നിന്ന് അറസ്റ്റ് ചെയ്തത്. സംഭവശേഷം ഒളിവിൽ കഴിഞ്ഞിരുന്ന ഇയാളെ പ്രത്യേക അന്വേഷണ സംഘമാണ് പിടികൂടിയത്.
ജൂൺ രണ്ടിനായിരുന്നു കേസിനാസ്പദമായ സംഭവം.
മഹാരാഷ്ട്ര സ്വദേശികൾ സഞ്ചരിച്ച കാർ പയ്യന്നൂരിൽവെച്ച് ഒരു സംഘം തടഞ്ഞുനിർത്തി ആക്രമിച്ചു. തുടർന്ന് കാറിലെ രഹസ്യ അറയിൽ സൂക്ഷിച്ചിരുന്ന ഏകദേശം ഒന്നര കോടിയുടെ സ്വർണവും പണവും കവർന്ന സംഘം വാഹനം പിലാത്തറയിൽ ഉപേക്ഷിച്ച് കടന്നുകളയുകയായിരുന്നു.
സംഭവത്തിൽ കഴിഞ്ഞ ആഴ്ച രണ്ട് പേരെ പൊലീസ് അറസ്റ്റ് ചെയ്തിരുന്നു. ഇവരെ ചോദ്യം ചെയ്തതിന്റെ അടിസ്ഥാനത്തിലാണ് അന്വേഷണം ജിജിലിലേക്കെത്തിയത്. ഇയാളിൽ നിന്ന് ലഭിക്കുന്ന വിവരങ്ങൾ കേസിലെ മറ്റ് പ്രതികളിലേക്കും കവർച്ചാ സംഘത്തിന്റെ മുഖ്യ ആസൂത്രകരിലേക്കും എത്താൻ സഹായിക്കുമെന്നാണ് അന്വേഷണ സംഘത്തിന്റെ പ്രതീക്ഷ.അറസ്റ്റിലായ ജിജിലിനെ ഇന്ന് കോടതിയിൽ ഹാജരാക്കും. അന്വേഷണം തുടരുകയാണെന്ന് പൊലീസ് അറിയിച്ചു.
