പ്രതിപക്ഷ ഉപനേതാവ് തർക്കം; നിർണായക നേതൃയോഗങ്ങൾ അടുത്തയാഴ്ച

പ്രതിപക്ഷ ഉപനേതൃ സ്ഥാനം ചൊല്ലി എൽഡിഎഫിൽ തുടരുന്ന തർക്കത്തിനിടെ അടുത്തയാഴ്ച നിർണായക നേതൃയോഗങ്ങൾ. ഈ മാസം 22ന് ചേരുന്ന സിപിഐഎം സംസ്ഥാന സെക്രട്ടറിയേറ്റിൽ സിപിഐയുടെ കടുത്ത നിലപാട് പ്രധാന ചർച്ചയാകും.തുടർന്ന് 23, 24 തീയതികളിൽ ചേരുന്ന സിപിഐഎം സംസ്ഥാന കമ്മിറ്റി, സിപിഐയുടെ ആവശ്യം അംഗീകരിക്കണമോയെന്ന കാര്യത്തിൽ വിശദമായ ചർച്ച നടത്തും. അതേ ദിവസം തന്നെ സിപിഐ സംസ്ഥാന സെക്രട്ടറിയേറ്റും യോഗം ചേരും.പ്രതിപക്ഷ ഉപനേതൃ സ്ഥാനം ലഭിച്ചില്ലെങ്കിൽ സിപിഐഎമ്മിനെതിരെ കടുത്ത നിലപാട് സ്വീകരിക്കണമെന്ന അഭിപ്രായത്തിലാണ് സിപിഐയിലെ മുതിർന്ന നേതാക്കൾ. ഇരു പാർട്ടികളുടെയും യോഗങ്ങളിൽ കൈക്കൊള്ളുന്ന തീരുമാനങ്ങൾ എൽഡിഎഫിലെ തുടർ രാഷ്ട്രീയ നീക്കങ്ങൾക്ക് നിർണായകമാകും.