മലേഷ്യയിലെ ക്വാലാലംപൂരിൽ നിന്ന് കൊച്ചിയിലേക്ക് വന്ന ബാട്ടിക്ക് എയർ വിമാനത്തിൽ യാത്രയ്ക്കിടെ എമർജൻസി വാതിൽ തുറക്കാൻ ശ്രമിച്ച യാത്രക്കാരനെ നെടുമ്പാശ്ശേരി പോലീസ് കസ്റ്റഡിയിലെടുത്തു. നെടുമ്പാശ്ശേരി സ്വദേശി ജംഷീറാണ് പിടിയിലായത്.
യാത്രയ്ക്കിടെ ഇയാൾ വിമാനത്തിന്റെ എമർജൻസി വാതിൽ തുറക്കാൻ ശ്രമിച്ചതായും, വിമാന ജീവനക്കാർ തടഞ്ഞപ്പോൾ എമർജൻസി വിൻഡോ പാനലിൽ അടിച്ച് കേടുപാടുകൾ വരുത്തിയതായും അധികൃതർ അറിയിച്ചു. തുടർന്ന് ജീവനക്കാരും സഹയാത്രികരും ചേർന്ന് ഇയാളെ കീഴ്പ്പെടുത്തുകയായിരുന്നു.
വിമാനം സുരക്ഷിതമായി കൊച്ചി അന്താരാഷ്ട്ര വിമാനത്താവളത്തിൽ ഇറങ്ങിയ ഉടൻ ജംഷീറിനെ പോലീസിന് കൈമാറി. ഇയാൾക്ക് മാനസികാസ്വാസ്ഥ്യമുണ്ടോയെന്ന സംശയവും പോലീസ് പരിശോധിക്കുന്നുണ്ട്. സംഭവത്തിൽ നെടുമ്പാശ്ശേരി പോലീസ് കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചു.
