വഖഫ് ബോർഡിന്റെ പ്രവർത്തനങ്ങൾക്ക് നിയന്ത്രണം ഏർപ്പെടുത്തിയ ഹൈക്കോടതി ഉത്തരവ് മുനമ്പം ഭൂവിഷയത്തിൽ പ്രതീക്ഷ പകരുന്നതാണെന്ന് സമരസമിതി. നിലവിലെ വഖഫ് ബോർഡിന്റെ നിലപാടാണ് പ്രശ്നപരിഹാരത്തിന് തടസ്സമായതെന്നും, പുതിയ ബോർഡ് നിലവിൽ വന്നാൽ നടപടികൾ വേഗത്തിലാകുമെന്നുമാണ് സമരസമിതി പറയുന്നത്. പുതിയ യുഡിഎഫ് സർക്കാർ മുനമ്പം വിഷയം പരിഹരിക്കുമെന്ന പ്രതീക്ഷയിലാണ് സമരസമിതി.
മുനമ്പം ഭൂവിഷയത്തിൽ ഇടതുസർക്കാർ നിയോഗിച്ച ജുഡീഷ്യൽ കമ്മീഷൻ നേരത്തെ സംസ്ഥാന സർക്കാരിന് ശുപാർശകൾ സമർപ്പിച്ചിരുന്നു. എന്നാൽ പുതിയ സർക്കാർ അധികാരത്തിലെത്തിയ ശേഷവും ഇതിൽ തുടർനടപടികൾ ഉണ്ടായിട്ടില്ല. പുതിയ വഖഫ് ബോർഡ് നിലവിൽ വന്നാൽ ഈ വിഷയത്തിൽ തീരുമാനമുണ്ടാകുമെന്നാണ് സമരസമിതിയുടെ പ്രതീക്ഷ.
വഖഫ് ബോർഡ് അംഗങ്ങളെ നിയമപ്രകാരമല്ല തെരഞ്ഞെടുത്തതെന്ന പരാതിയിൽ പ്രഥമദൃഷ്ട്യാ കഴമ്പുണ്ടെന്ന് കണ്ടെത്തിയാണ് ഹൈക്കോടതി ബോർഡിന്റെ പ്രവർത്തനങ്ങൾക്ക് നിയന്ത്രണം ഏർപ്പെടുത്തിയത്. നിയമാനുസൃതമായി പുതിയ ബോർഡ് പുനഃസംഘടിപ്പിക്കാൻ തയ്യാറാണെന്ന് സംസ്ഥാന സർക്കാരും കോടതിയെ അറിയിച്ചിട്ടുണ്ട്.
