ആലപ്പുഴ ചേർത്തല പാണാവള്ളിയിൽ മുൻ വൈരാഗ്യത്തിന്റെ പേരിൽ വയോധികനെ സമീപവാസിയും കുടുംബാംഗങ്ങളും ചേർന്ന് തെങ്ങിൽ കെട്ടിയിട്ട് മർദിച്ചെന്ന് പരാതി. പാണാവള്ളി സ്വദേശി വിജയൻ (64) ആണ് ആക്രമണത്തിന് ഇരയായത്. സംഭവത്തിൽ പൂച്ചാക്കൽ പൊലീസ് അഞ്ച് പേർക്കെതിരെ കേസെടുത്തു
നാല് ദിവസം മുമ്പാണ് കേസിനാസ്പദമായ സംഭവം. മുൻ വൈരാഗ്യത്തിന്റെ പേരിൽ വീട്ടിൽ ആരും ഇല്ലാതിരുന്ന സമയത്ത് വിജയനെ മർദിക്കുകയും തെങ്ങിൽ കെട്ടിയിട്ട് അടിക്കുകയും ചെയ്തു എന്നാണ് പരാതി. ഉടുമുണ്ട് ഉരിഞ്ഞ് തെങ്ങിൽ കെട്ടിയിട്ട് ആയിരുന്നു കൂട്ടംചേർന്ന് ആക്രമിച്ചത്. സംഭവത്തിൽ വിജയൻറെ മൂക്കിന്റെ അസ്ഥി പൊട്ടുകയും മുഖത്ത് പരിക്കേൽക്കുകയും ചെയ്തു. ക്രൂരമർദനത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് പൊലീസിൽ പരാതി എത്തിയത്. അയൽവാസിയായ സത്താർ ഉൾപ്പെടെ അഞ്ച് പേർക്കെതിരെയാണ് പൂച്ചാക്കൽ പൊലീസ് കേസെടുത്തിരിക്കുന്നത്. വിജയനെ അയൽവാസികൾ നേരത്തെ ആക്രമിച്ചതിന് നിലവിൽ കോടതിയിൽ കേസുണ്ട്. അതിന്റെ വിരോധത്തിലാണ് വീണ്ടും ആക്രമണം. വീട്ടുമുറ്റത്ത് നിന്ന വിജയനെ വലിച്ചിഴച്ച് പ്രതികളുടെ വീട്ടുമുറ്റത്ത് എത്തിച്ചാണ് മർദിച്ചത് എന്നാണ് പൊലീസ് പറയുന്നത്. പ്രതികൾക്കായി പൂച്ചാക്കൽ പൊലീസ് അന്വേഷണം ആരംഭിച്ചു.
