സംസ്ഥാനത്ത് വേനൽ മഴ കനക്കുന്നു. 12 ജില്ലകളിൽ ഇന്ന് മഴ മുന്നറിയിപ്പുണ്ട്. അതിശക്തമായ മഴയ്ക്ക് സാധ്യതയുള്ളതിനാൽ എറണാകുളം ജില്ലയിൽ ഓറഞ്ച് അലേർട്ട് പ്രഖ്യാപിച്ചു. ജലനിരപ്പ് ഉയർന്നതോടെ ഭൂതത്താന്കെട്ട് ബാരേജിന്റെ ഷട്ടറുകള് തുറന്നു.
തെക്ക് പടിഞ്ഞാറൻ മൺസൂൺ എത്താനിരിക്കെ സംസ്ഥാനത്ത് വേനൽ മഴയും കനക്കുകയാണ്. ബംഗാൾ ഉൾക്കടലിന് മുകളിലെ ചക്രവാതച്ചുഴിയാണ് മഴ ശക്തമാകാൻ കാരണം. എറണാകുളം ജില്ലയിൽ മലയോര മേഖലകളിലടക്കം കനത്ത മഴ തുടരുകയാണ്. താഴ്ന്ന പ്രദേശങ്ങളിൽ വെള്ളക്കെട്ട് രൂപപ്പെട്ടതോടെ ഗതാഗതക്കുരുക്ക് രൂക്ഷമായി. വൈറ്റില, ഇടപ്പള്ളി മേഖലകളിലും വെള്ളക്കെട്ട് പ്രതിസന്ധിയായി. ജലനിരപ്പ് ക്രമീകരിക്കുന്നതിനായി ഭൂതത്താന്കെട്ട് ബാരേജിന്റെ ഷട്ടറുകള് നിയന്ത്രിത അളവിൽ തുറന്നു. വരുന്ന അഞ്ച് ദിവസം കൂടി വേനൽ മഴ തുടരുമെന്നാണ് കേന്ദ്ര കാലാവസ്ഥാ വകുപ്പിൻ്റെ മുന്നറിയിപ്പ്. മഴയ്ക്കൊപ്പം ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ മലയോര മേഖലകളിൽ അടക്കം പ്രത്യേകം ജാഗ്രത പുലർത്തണം. തീരദേശ മേഖലകളിലും ജാഗ്രതാ നിർദേശമുണ്ട്. കേരള, കർണാടക, ലക്ഷദ്വീപ് തീരങ്ങളിൽ മത്സ്യബന്ധനത്തിനും വിലക്കുണ്ട്.
