എറണാകുളം വൈപ്പിൻ മുനമ്പത്ത് ഐസ് പ്ലാന്റിൽ അമോണിയം ചോർച്ച. മുനമ്പം മിനി ഫിഷിംഗ് ഹാർബറിന് സമീപം പ്രവർത്തിക്കുന്ന സാവിയോ ഐസ് പ്ലാന്റിലാണ് അമോണിയം ചോർച്ചയുണ്ടായത്. പ്രദേശവാസികളും തൊഴിലാളികളും ഉൾപ്പെടെ 12 പേരാണ് സംഭവ സമയം സ്ഥലത്തുണ്ടായിരുന്നത്. ഫയർഫോഴ്സ് സംഘം ഉടൻ എത്തിയതിനാൽ വാതക ചോർച്ച നിയന്ത്രിക്കാനായി. ശ്വാസ തടസവും ദേഹാസ്വാസ്ഥ്യവും അനുഭവപ്പെട്ടവരെ ഉടൻ തന്നെ ആശുപത്രിയിൽ പ്രവേശിപ്പിച്ചു.
ഐസ് പ്ലാന്റ് ഭിത്തിയുടെ കോൺക്രീറ്റ് സ്ലാബ് അമോണിയ പൈപ്പിലേക്ക് തകർന്ന് വീണ് പൈപ്പ് പൊട്ടിയതാണ് ചോർച്ചയ്ക്ക് കാരണമായത്. സ്ലാബ് തകർന്നുവീഴുമ്പോൾ പ്ലാന്റിൽ ഉണ്ടായിരുന്ന തൊഴിലാളികൾ തലനാരിഴയ്ക്കാണ് രക്ഷപ്പെട്ടത്. അപകടത്തിന്റെ പശ്ചാത്തലത്തിൽ കെട്ടിടത്തിന്റെ ബലക്ഷയം ഉൾപ്പെടെ വിശദമായി പരിശോധിക്കും.
