വിലക്കുകൾ ലംഘിച്ച് കൊച്ചിൻ ശാസ്ത്ര-സാങ്കേതിക സർവകലാശാലയിൽ സംഗീതനിശ സംഘടിപ്പിച്ചതായി ആരോപണം. ഫിറ്റ്നസ് ഇല്ലാത്ത ഓപ്പൺ എയർ ഓഡിറ്റോറിയത്തിലാണ് സ്റ്റുഡന്റ്സ് യൂണിയൻ പരിപാടി നടത്തിയത്.രാത്രി എട്ട് മണിവരെ പരിപാടി നടത്താൻ കുസാറ്റ് കളമശ്ശേരി നഗരസഭയോട് അനുമതി തേടിയിരുന്നു. എന്നാൽ ഓഡിറ്റോറിയത്തിന് ഫിറ്റ്നസ് സർട്ടിഫിക്കറ്റ് ഇല്ലാത്തതിനാൽ നഗരസഭ അനുമതി നിഷേധിച്ചു.
അനുമതി നിഷേധിച്ചിട്ടും രാത്രി എട്ട് മണിയോടെ ഗായിക അഞ്ജു ജോസഫിന്റെ സംഗീതനിശ ആരംഭിച്ചു. രാത്രി പത്ത് മണിക്ക് ശേഷമാണ് പരിപാടി അവസാനിച്ചത്.അനുമതിയില്ലാതെ പരിപാടി നടത്തിയതിന് കുസാറ്റിന് നോട്ടീസ് നൽകുമെന്ന് കളമശ്ശേരി നഗരസഭ അധ്യക്ഷൻ ജമാൽ മണക്കാടൻ പറഞ്ഞു. ഫിറ്റ്നസ് ഇല്ലാതെയാണ് ഓഡിറ്റോറിയം പ്രവർത്തിച്ചതെന്നും ഇക്കാര്യത്തിൽ സർക്കാരിനെ സമീപിക്കുമെന്നും അദ്ദേഹം വ്യക്തമാക്കി.
2023ൽ ഇതേ സ്ഥലത്ത് നടന്ന അപകടത്തിൽ നാല് പേർ മരിച്ചിരുന്നു. സുരക്ഷാ മാനദണ്ഡങ്ങൾ പാലിക്കാതെയാണ് വീണ്ടും പരിപാടി നടത്തിയതെന്ന ആരോപണമാണ് ഉയരുന്നത്.
