എൻസിഇആർടി പാഠപുസ്തക സമിതി പുനഃസംഘടിപ്പിച്ചു; പുതിയ രാഷ്ട്രീയശാസ്ത്ര പുസ്തകങ്ങളിൽ ഇന്ത്യൻ വിജ്ഞാനപദ്ധതിക്കും സാംസ്കാരിക വേരുകൾക്കും ഊന്നൽ

11, 12 ക്ലാസുകളിലെ രാഷ്ട്രീയശാസ്ത്ര പാഠപുസ്തകങ്ങൾ തയ്യാറാക്കുന്നതിനുള്ള എൻസിഇആർടിയുടെ ടെക്സ്റ്റ്ബുക്ക് ഡെവലപ്‌മെന്റ് ടീമിനെ പുനഃസംഘടിപ്പിച്ചു. 20 അംഗങ്ങളടങ്ങിയ പുതിയ സമിതിയെ ഓഗസ്റ്റ് 14നാണ് എൻസിഇആർടി ഡയറക്ടർ ഡി.പി. സക്ലാനി വിജ്ഞാപനം ചെയ്തത്. അക്കാദമിക് വിദഗ്ധരും അധ്യാപകരും എൻസിഇആർടി പ്രതിനിധികളും ഉൾപ്പെടുന്നതാണ് പുതിയ സമിതി.

അക്കാദമിക്, രാഷ്ട്രീയ വിശകലന വിദഗ്ധനായ സന്ദീപ് ശാസ്ത്രിയാണ് സമിതി അധ്യക്ഷൻ. നാഷണൽ എജ്യുക്കേഷൻ പോളിസി 2020, നാഷണൽ കരിക്കുലം ഫ്രെയിംവർക്ക് ഫോർ സ്കൂൾ എജ്യുക്കേഷൻ 2023 എന്നിവയ്ക്ക് അനുസൃതമായാണ് പുതിയ പാഠപുസ്തകങ്ങൾ തയ്യാറാക്കുക. സാംസ്കാരിക വേരുകളുമായി ബന്ധപ്പെട്ട ഉള്ളടക്കം, ഇന്ത്യൻ വിജ്ഞാനപദ്ധതികൾ, ഉൾക്കൊള്ളൽ, വിദ്യാഭ്യാസ സാങ്കേതികവിദ്യ തുടങ്ങിയ വിഷയങ്ങൾക്ക് കൂടുതൽ പ്രാധാന്യം നൽകാനാണ് നിർദേശം.

2026 നവംബറോടെ 11-ാം ക്ലാസിന്റെ രാഷ്ട്രീയശാസ്ത്ര പുസ്തകം തയ്യാറാക്കാനാണ് ലക്ഷ്യമിടുന്നത്. 12-ാം ക്ലാസിന്റെ പുസ്തകം 2027 ജൂലൈയോടെ തയ്യാറാക്കും. പുസ്തകങ്ങളുടെ സിലബസ് അന്തിമമാക്കുന്നതും പഠന-പാഠന സാമഗ്രികൾ വികസിപ്പിക്കുന്നതും പുതിയ സമിതിയുടെ ചുമതലയാണ്. ആവശ്യമായ വിഷയങ്ങളിൽ വിദഗ്ധരെയും അധ്യാപകരെയും പ്രത്യേക ക്ഷണിതാക്കളായി ഉൾപ്പെടുത്താനും സമിതിക്ക് അനുമതിയുണ്ട്.

അതേസമയം, സമിതിയുടെ ഘടന രാഷ്ട്രീയ വിവാദത്തിനും വഴിവെച്ചിട്ടുണ്ട്. 20 അംഗങ്ങളിൽ കുറഞ്ഞത് നാല് പേർക്ക് ആർഎസ്എസ്, എബിവിപി അല്ലെങ്കിൽ ബിജെപിയുമായി നേരിട്ടോ പരോക്ഷമായോ ബന്ധമുണ്ടെന്നാണ് റിപ്പോർട്ടുകൾ. ഇതിന്റെ പശ്ചാത്തലത്തിൽ പാഠപുസ്തകങ്ങളുടെ അക്കാദമിക് നിഷ്പക്ഷതയെയും ആശയവൈവിധ്യത്തെയും കുറിച്ച് എൻഎസ് യുഐ ചോദ്യങ്ങൾ ഉയർത്തി. സമിതി പിരിച്ചുവിട്ട് സ്വതന്ത്ര വിദ്യാഭ്യാസ വിദഗ്ധരെ ഉൾപ്പെടുത്തി പുനഃസംഘടിപ്പിക്കണമെന്നാണ് എൻഎസ് യുഐ യുടെ ആവശ്യം.

എന്നാൽ ഇന്ത്യൻ വിജ്ഞാനപാരമ്പര്യവും സാംസ്കാരിക വേരുകളും ഉൾപ്പെടുത്തുക എന്നത് പുതിയ വിദ്യാഭ്യാസ നയത്തിന്റെ ഭാഗമായുള്ള ലക്ഷ്യങ്ങളാണെന്ന് എൻസിഇആർടിയുടെ നടപടിയെ അനുകൂലിക്കുന്നവർ ചൂണ്ടിക്കാട്ടുന്നു. പുതിയ രാഷ്ട്രീയശാസ്ത്ര പുസ്തകങ്ങളിൽ ഈ സമീപനം എത്രത്തോളം പ്രതിഫലിക്കുമെന്നതിലാണ് ഇനി ശ്രദ്ധ.പുതിയ പുസ്തകങ്ങളുടെ കരടുകൾ തയ്യാറാക്കിയ ശേഷം അവയ്ക്ക് വിവിധ ഘട്ടങ്ങളിലുള്ള അക്കാദമിക് പരിശോധനയും അവലോകനവും ഉണ്ടാകും. അതിനാൽ സമിതിയിലെ അംഗങ്ങളുടെ പശ്ചാത്തലത്തെച്ചൊല്ലിയുള്ള രാഷ്ട്രീയ വിവാദത്തിനൊപ്പം, അന്തിമ പാഠപുസ്തകങ്ങളിൽ ഉള്ളടക്കം എങ്ങനെ രൂപപ്പെടുമെന്നതും നിർണായകമാകും.