ഓണക്കാലത്തെ യാത്രാ തിരക്ക് കണക്കിലെടുത്ത് കേരളത്തിലേക്ക് 100 പ്രത്യേക ട്രെയിൻ സർവീസുകൾ നടത്തുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ് പ്രഖ്യാപിച്ചു. ഒഡീഷയിലെ ഭുവനേശ്വറിൽ നടന്ന പരിപാടിക്കിടെയായിരുന്നു പ്രഖ്യാപനം.ബെംഗളൂരു, ചെന്നൈ, ഹൈദരാബാദ് തുടങ്ങിയ നഗരങ്ങളിൽ നിന്നും കേരളത്തിലേക്ക് സ്പെഷ്യൽ സർവീസുകളുണ്ടായേക്കും.പ്രത്യേക ട്രെയിനുകളുടെ റൂട്ടുകൾ, സർവീസ് തീയതികൾ, സ്റ്റോപ്പുകൾ എന്നിവ ഉടൻ പ്രഖ്യാപിക്കുമെന്ന് മന്ത്രി അറിയിച്ചു.
ഈ വർഷം ജൂൺ 30-ന് അവസാനിച്ച വേനൽക്കാല സീസണിൽ രാജ്യത്തുടനീളം റെക്കോർഡ് 15,000 പ്രത്യേക ട്രെയിനുകൾ സർവീസ് നടത്തിയതായും മന്ത്രി വ്യക്തമാക്കി. ഒഡീഷയിലെ ജഗന്നാഥ രഥയാത്രയ്ക്കായി 300-ലധികം പ്രത്യേക ട്രെയിനുകളും ഓണത്തോടനുബന്ധിച്ച് കേരളത്തിനായി 100 പ്രത്യേക ട്രെയിനുകളും ഒരുക്കുന്നതിലൂടെ യാത്രക്കാർക്ക് സുരക്ഷിതവും താങ്ങാനാവുന്നതുമായ യാത്ര ഉറപ്പാക്കുകയാണ് ലക്ഷ്യമെന്നും അദ്ദേഹം പറഞ്ഞു.
