മലപ്പുറം ജില്ലാ വിഭജന ആവശ്യം വീണ്ടും രാഷ്ട്രീയ ചർച്ചയാകുന്നു. തിരൂരങ്ങാടി ആസ്ഥാനമായി പുതിയ ജില്ല രൂപീകരിക്കണമെന്നാണ് മുസ്ലീം യൂത്ത് ലീഗിന്റെ ആവശ്യം. തിരൂരങ്ങാടി മണ്ഡലം മുസ്ലീം യൂത്ത് ലീഗ് പ്രതിനിധി സമ്മേളനത്തിലാണ് വിഷയം പ്രമേയമായി അവതരിപ്പിച്ചത്
വലിയ ജനസംഖ്യയും വ്യാപ്തിയും കാരണം മലപ്പുറം ജില്ലയെ രണ്ടായി വിഭജിക്കണമെന്നാണ് ആവശ്യം. ഏറനാട്, പെരിന്തൽമണ്ണ, നിലമ്പൂർ താലൂക്കുകൾ ഉൾപ്പെടുത്തി “മലപ്പുറം” എന്ന പേരിൽ ഒരു ജില്ല രൂപീകരിച്ച് മലപ്പുറം നഗരത്തെ ആസ്ഥാനമാക്കണമെന്നും തിരൂർ, പൊന്നാനി, തിരൂരങ്ങാടി, കൊണ്ടോട്ടി താലൂക്കുകൾ ഉൾപ്പെടുത്തി “തിരൂരങ്ങാടി” എന്ന പേരിൽ പുതിയ ജില്ല രൂപീകരിച്ച് തിരൂരങ്ങാടിയെ ആസ്ഥാനമാക്കണം എന്നുമാണ് പ്രമേയം.
വിഭജനത്തിലൂടെ ഭരണ കാര്യക്ഷമത വർധിക്കുമെന്നും സർക്കാർ സേവനങ്ങൾ ജനങ്ങളിലേക്ക് വേഗത്തിൽ എത്തുമെന്നും യൂത്ത് ലീഗ് ചൂണ്ടിക്കാട്ടുന്നു. പ്രാദേശിക വികസനത്തിലെ അസമത്വം കുറയ്ക്കാനും പുതിയ ഇൻഫ്രാസ്ട്രക്ചർ പദ്ധതികൾക്കും തൊഴിൽ അവസരങ്ങൾക്കും വഴിയൊരുങ്ങും എന്നുമാണ് വിലയിരുത്തൽ. തീരപ്രദേശം, മലയോര മേഖല, നഗരമേഖല എന്നീ വ്യത്യസ്ത മേഖലകൾക്ക് പ്രത്യേക വികസന നയങ്ങൾ നടപ്പാക്കാൻ വിഭജനം സഹായിക്കുമെന്നും യൂത്ത് ലീഗ് അവകാശപ്പെടുന്നു. സമസ്ത എപി-ഇകെ വിഭാഗങ്ങളും നേരത്തെ ജില്ലാ വിഭജന ആവശ്യം ഉയർത്തിയിരുന്നു
