എഴുപതിലേറെ സിസിടിവി ദൃശ്യങ്ങൾ പരിശോധിച്ചാണ് മുളന്തുരുത്തി പൊലീസ് പ്രതികളെ പിടികൂടിയത്. ബൈക്കിൽ നിന്ന് പെട്രോൾ ഊറ്റുന്നതിനിടെ അബദ്ധത്തിൽ തീപിടിച്ചുവെന്നാണ് നിഗമനം.
അരയൻ കാവ് വളവുകല്ലിൽ പ്രവർത്തിക്കുന്ന ഹന്ന ഓട്ടോമൊബൈൽസ് വർക്ക് ഷോപ്പിൽ ഓഗസ്റ്റ് പത്തൊൻപതിനായിരുന്നു തീപ്പിടുത്തം. രാത്രി പതിനൊന്നേകാലോടെയുണ്ടായ തീപ്പിടുത്തതിൽ വർക്ഷോപ്പിൽ പാർക്ക് ചെയ്തിരുന്ന മൂന്ന് ബൈക്കുകളാണ് കത്തിനശിച്ചത്. എഴുപതിനായിരത്തിലേറെ രൂപയുടെ നഷ്ടമാണ് സംഭവിച്ചത്. തീ കൂടുതൽ സ്ഥലങ്ങളിലേക്ക് പടരും മുൻപ് കെടുത്താനായത് ആശ്വാസമായി. തുടർന്ന് നടത്തിയ അന്വേഷണത്തിലാണ് തീപ്പിടുത്തം മനപ്പൂർവമാണെന്ന് പൊലീസ് ഉറപ്പിച്ചത്. വർക്ക് ഷോപ്പിലെ സിസിടിവി ദൃശ്യങ്ങളിൽ നാല് പേരുടെ ദൃശ്യങ്ങൾ പതിഞ്ഞു. നാല് പേരും ഇട്ടിരുന്ന ബനിയൻ ഉപയോഗിച്ച് മുഖം മറച്ച നിലയിലായിരുന്നു. വർക്ക് ഷോപ്പിലേക്ക് പ്രവേശിക്കുന്നതും ബൈക്കിന് തീപിടിക്കുന്നതും തുടർന്ന് നാല് പേർ രക്ഷപ്പെടുന്നതും ദൃശ്യങ്ങളിലുണ്ട്. മുഖം വ്യക്തമല്ലാത്തതിനാൽ പൊലീസിന് അന്വേഷണം എളുപ്പമായില്ല. തുടർന്ന് പരിസരത്തെ കടകളിലെയും വീടുകളിലെയും സിസിടിവി ദൃശ്യങ്ങൾ ശേഖരിച്ച് നടത്തിയ അന്വേഷണമാണ് വഴിത്തിരിവായത്. ഈ ദൃശ്യങ്ങളിൽ നിന്ന് പ്രതികളിൽ ഒരാളെ തിരിച്ചറിഞ്ഞു. തുടർന്നാണ് ബ്രഹ്‌മമംഗലം സ്വദേശി വിജയ് കൃഷ്ണ, വൈക്കം ഏനാദി സ്വദേശികളായ സാഗർ ബാബു, സംഗീത് സിബി എന്നിവർ പിടിയിലായത്. പിടിയിലായ മൂന്ന് പേർക്കും പത്തൊൻപത് വയസ്സാണ് പ്രായം. ഇവരുടെ കൂടെയുള്ള നാലാമനായി അന്വേഷണം തുടരുകയാണ്. വർക്ക് ഷോപ്പിലെ ബൈക്കുകളിൽ നിന്ന് പെട്രോൾ മോഷ്ടിക്കാനായി എത്തിയതാണ് സംഘമെന്നാണ് വിവരം. സിസിടിവി ദൃശ്യങ്ങളിൽ ഇവരുടെ കയ്യിൽ പ്ലാസ്റ്റിക് കുപ്പികളും കാണാം. ഓരോ ബൈക്കിൽ നിന്നായി പെട്രോൾ ഊറ്റുന്നതിനിടെ തീപ്പിടിച്ചുവെന്നാണ് മൊഴി. തീ കെടുത്താൻ ശ്രമിച്ചെങ്കിലും പരാജയപ്പെട്ടു. തുടർന്ന് നാല് പേരും ഓടി രക്ഷപ്പെടുകയായിരുന്നു. തീപിടുത്തത്തിന് പിന്നിൽ മറ്റെന്തെങ്കിലും കാരണങ്ങളുണ്ടോ എന്നും പൊലീസ് അന്വേഷിക്കുന്നുണ്ട്.
