സംസ്ഥാന സർക്കാരിന്‍റെ ആറുമാസത്തെ അസൽ കണക്കുകൾ ബിഗ് ടിവി പുറത്തുവിടുന്നു.
ഏപ്രിൽ മുതൽ സെപ്റ്റംബർ വരെയുള്ള ആറുമാസം കൊണ്ട് സർക്കാർ കടമെടുത്തത് 35,467.88 കോടി രൂപ. ഇതേ സമയത്ത് പിണറായി വിജയൻ സർക്കാർ കഴിഞ്ഞ വർഷം എടുത്തത് 30,772.87 കോടി രൂപ. കഴിഞ്ഞ വർഷത്തേക്കാൾ കൂടുതൽ എടുത്തത് 4,695 കോടി രൂപ. കഴിഞ്ഞ പിണറായി വിജയൻ സർക്കാർ കടമെടുക്കുന്നതിന് രൂക്ഷമായി വിമർശിച്ചിരുന്ന വി ഡി സതീശനും കടമെടുക്കാതെ മുന്നോട്ടു പോകാൻ കഴിയില്ല എന്നാണ് കണക്കുകൾ കാണിക്കുന്നത്. കഴിഞ്ഞ സെപ്റ്റംബറിൽ പിണറായി വിജയൻ സർക്കാർ 3798 കോടി കടമെടുത്തിരുന്നെങ്കിൽ ഈ സെപ്റ്റംബറിൽ 4,906 കോടി കടമെടുക്കേണ്ടി വന്നു. മാസം 1200 കോടി വരെ അധികം കടമെടുക്കേണ്ട സ്ഥിതി.
നികുതി വരുമാനത്തിലെ മാറ്റം
മുൻവർഷത്തേക്കാൾ മൊത്തം നികുതി വരുമാനത്തിൽ 11,000 കോടി രൂപയിലധികം വർദ്ധന ഈ വർഷം ഉണ്ടായിട്ടുണ്ട്. നികുതി വരുമാനം ഓഗസ്റ്റിൽ 14,000 കോടി ചരിത്രത്തിലാദ്യമായി പിന്നിട്ടിരുന്നു. സെപ്റ്റംബറിൽ 10,927 കോടിയും ലഭിച്ചു. ഈ രണ്ടുമാസത്തെ വരുമാന വർദ്ധനയാണ് സർക്കാരിനെ വലിയ പ്രതിസന്ധിയിൽ നിന്ന് തൽക്കാലത്തേക്ക് രക്ഷിച്ചത്. കഴിഞ്ഞവർഷത്തെ ആദ്യ ആറുമാസം 51,367 കോടിയാണ് നികുതിയായി കിട്ടിയതെങ്കിൽ, ഈ വർഷത്തെ ആറുമാസം അത് 62,506 കോടി രൂപയാണ്. നികുതിയിലെ ഈ വർദ്ധന വലിയ ഗുണം ചെയ്യാത്തതിനു കാരണം ചെലവിലുണ്ടായ വർദ്ധനയാണ്. റവന്യൂ ചെലവ് മുൻവർഷത്തെ ആദ്യ ആറുമാസം 27,194 കോടി രൂപ മാത്രമായിരുന്നു. ഈ വർഷം അത് 33,280 കോടി രൂപയായി വർദ്ധിച്ചു. 6086 കോടി രൂപയുടെ വർദ്ധന. പലിശയായി ആദ്യത്തെ ആറുമാസം നൽകിയത് 15,456 കോടി രൂപയാണ്. മുൻവർഷത്തേക്കാൾ 1000 കോടിയിലേറെയാണ് വർദ്ധന.
ശമ്പള ഇനത്തിൽ 3,800 കോടി രൂപയും പെൻഷനിൽ 2,000 കോടി രൂപയും അധികച്ചെലവ് ഉണ്ടായി. ശമ്പളവും പെൻഷനും പലിശയുമായി 61,501 കോടി രൂപയാണ് ചെലവഴിക്കേണ്ടി വന്നത്. മൊത്തം നികുതി വരുമാനം 62,506 കോടി രൂപ മാത്രവും. ശമ്പളവും പെൻഷനും പലിശയും കഴിഞ്ഞാൽ 1000 കോടി രൂപമാത്രമാണ് ബാക്കിയുള്ളത്. ഈ സാഹചര്യത്തിലാണ് 33,281 കോടി റവന്യു ചെലവിന് അധിക പണം കണ്ടെത്തേണ്ടി വന്നത്. വായ്പയുടെ നല്ലൊരു പങ്കും അങ്ങനെ റവന്യു ചെലവിന് വേണ്ടി ഉപയോഗിക്കേണ്ടി വന്നു. കേന്ദ്ര സർക്കാരിന്‍റെ ഗ്രാൻഡ് ഇനത്തിൽ ഈ വർഷം കാര്യമായ തുകയൊന്നും ലഭിച്ചിട്ടില്ല. ബജറ്റിൽ 16,367 പ്രതീക്ഷിച്ചിരുന്നെങ്കിലും ഈ വർഷം ഇതുവരെ ലഭിച്ചത് 505 കോടി രൂപ മാത്രമാണ്. മൂലധനച്ചെലവായി 11,573 കോടി രൂപയാണ് ഈ വർഷം മുടക്കിയിരിക്കുന്നത്.
ഇനിയുള്ള വഴി എന്ത്?
45,000 കോടി രൂപയ്ക്കു മാത്രമാണ് കേന്ദ്രസർക്കാർ കടമെടുക്കാൻ അനുവദിച്ചിട്ടുള്ളത്. അതിൽ 35,000 കോടിയും ഇതുവരെ പിന്നിട്ടു കഴിഞ്ഞു. ശേഷിക്കുന്ന ആറുമാസംകൊണ്ട് കടമെടുക്കാവുന്നത് 10,000 കോടി രൂപ മാത്രമാണ്. വി ഡി സതീശൻ സർക്കാരിന് ഇനിയുള്ള ആറുമാസം കനത്ത ചെലവുകളുടേതാണ്. അടിസ്ഥാന സൗകര്യങ്ങളിൽ നല്ല രീതിയിൽ മുതൽ മുടക്ക് ആവശ്യമുണ്ട്. റോഡുകളും പാലങ്ങളും പണിയുന്നതിന് നല്ലൊരു തുക വേണം. കരാറുകാർക്ക് വലിയ തോതിൽ തുക കുടിശികയാണ്. ഈ സാഹചര്യത്തിൽ എവിടെ നിന്നു പണം കണ്ടെത്തും എന്നതാണ് നിർണായക ചോദ്യം. വലിയ വിവാദത്തിൽ അകപ്പെട്ട കിഫ്ബി വഴി ധനസമാഹാരണം ഇനി ഏതായാലും ഉണ്ടാകാൻ സാധ്യതയില്ല. കിഫ്ബിയുടെ പഴയ പ്രവർത്തനങ്ങളൊക്കെ പുനഃപരിശോധിച്ചുകൊണ്ടിരിക്കുകയാണ്. അടിസ്ഥാന സൗകര്യ വികസനത്തിനുൾപ്പെടെ പണം കണ്ടെത്തണമെങ്കിൽ കേന്ദ്രം കനിയാതെ രക്ഷയില്ല എന്ന നിലയിലാണ് സംസ്ഥാനം വന്നു നിൽക്കുന്നത്.
