ഹോർട്ടി വൈൻ വില്പന അനുമതി ഉത്തരവ് റദ്ദാക്കും

15 ശതമാനം വീര്യമുള്ള ഹോർട്ടി വൈൻ വില്പന അനുമതി ഉത്തരവ് റദ്ദാക്കും. സർക്കാരിന്റെ അബ്ക്കാരി നയം വരുന്നതിനു മുൻപ് ഇടതു സർക്കാരിന്റെ വിജ്ഞാപനം അനുസരിച്ച് നൽകിയ അനുമതിയിൽ മന്ത്രി എം ലിജു എക്സൈസ് കമ്മീഷണറോട് റിപ്പോർട്ട് തേടി. ബിയറിനേക്കാൾ വീര്യമുള്ള ഹോർട്ടി വൈൻ വിൽപ്പന ചാലക്കുടിയിലെ ബേക്കറിയിൽ ആണ് തുടങ്ങിയത്.

2024 ജനുവരിയിലാണ് അബ്കാരി ചട്ടങ്ങളിൽ ഭേദഗതി വരുത്തി രണ്ടാം പിണറായി വിജയൻ സർക്കാർ ഉത്തരവിറക്കിയത്. 15 ശതമാനം വീര്യമുള്ള ഹോർട്ടി വൈൻ വില്പനക്ക് 100 ചതുരശ്ര മീറ്ററിൽ കുറയാത്ത വിസ്തീർണ്ണം ഉള്ള ബേക്കറികൾക്ക് അടക്കം അനുമതി നൽകിയിരുന്നു. ഈ വിജ്ഞാപനം അനുസരിച്ച് കിട്ടിയ അപേക്ഷയിൽ ജൂൺ 21നാണ് എക്സൈസ് കമ്മീഷണർ ഹോർട്ടി വൈൻ വിൽപ്പനയ്ക്ക് അനുമതി നൽകിയത്. എന്നാൽ ഈ വിവരം എക്സൈസ് മന്ത്രി എം ലിജുവോ സർക്കാരോ അറിഞ്ഞിരുന്നില്ല. യുഡിഎഫ് സർക്കാരിന്റേതായ അബ്കാരി നയം വരുന്നതിനു മുൻപ് പിണറായി വിജയൻ സർക്കാരിന്റെ കാലത്തെ വിജ്ഞാപനത്തിൽ എക്സൈസ് കമ്മീഷണർ എടുത്ത നടപടിയിൽ സർക്കാരിന് കടുത്ത അതൃപ്ത്തിയുണ്ട്.

8% ആൽക്കഹോൾ കണ്ടെന്റ് ഉള്ള ബിയർ എക്സൈസ് സംവിധാനങ്ങൾ വഴി മാത്രം വിറ്റഴിക്കുമ്പോഴാണ് 15 ശതമാനം വീര്യമുള്ള ഹോർട്ടി വൈൻ ബേക്കറി വഴി വിൽപ്പന നടത്തുന്നത്. ഇത് യുഡിഎഫിന്റെ നയങ്ങൾക്ക് വിരുദ്ധമാണെന്ന് എക്സൈസ് മന്ത്രി പറയുന്നു.അതേസമയം പുതിയ നയം വരുന്നതുവരെ പുതിയ ലൈസൻസുകൾ നൽകരുത് എന്ന നിർദ്ദേശം സർക്കാരിൽ നിന്ന് ലഭിച്ചത് ഓഗസ്റ്റിൽ മാത്രമാണെന്നാണ് എക്സൈസ് കമ്മീഷണറുടെ വിശദീകരണം. അതിനു ശേഷം ഒരു അനുമതിയും നൽകിയിട്ടില്ലെന്നും വിശദീകരണം .വീര്യം കുറഞ്ഞ മദ്യത്തിന്റെ നികുതി കുറയ്ക്കാനുള്ള നടപടിക്കെതിരെ യുഡിഎഫിനുള്ളിൽ വലിയ എതിർപ്പ് ഉയരുന്നതിനിടെ ആണ് ഹോർട്ടി വൈൻ വില്പന തുടങ്ങിയത് . വീര്യം കുറഞ്ഞ മദ്യത്തിന് നികുതി കുറച്ച യുഡിഎഫ് സർക്കാരിന്റെ നിലപാടിനെതിരെ രംഗത്തെത്തിയ പ്രതിപക്ഷം ഭരണപക്ഷത്തിരിക്കുമ്പോൾ ആണ് 15 ശതമാനം വീര്യമുള്ള ഹോർട്ടിവൈൻ വില്പനയ്ക്ക് അനുമതി നൽകി വിജ്ഞാപനം ഇറക്കിയത്.