റഷ്യൻ വ്യോമസേനയുടെ തന്ത്രപ്രധാന ബോംബർ വിമാനം പരിശീലനപ്പറക്കലിനിടെ തകർന്നുവീണ് ആറ് സൈനികർ മരിച്ചു. റഷ്യയുടെ കിഴക്കൻ മേഖലയിലെ അമൂർ പ്രദേശത്താണ് അപകടം. പരിശീലന ദൗത്യത്തിനായി പറന്നുയരുന്നതിനിടെ എൻജിൻ തകരാറിനെ തുടർന്നാണ് ടിയു-95 വിമാനം തകർന്നതെന്ന് റഷ്യൻ പ്രതിരോധ മന്ത്രാലയം അറിയിച്ചു.
വിമാനത്തിലുണ്ടായിരുന്ന ഒരാൾ മാത്രമാണ് അപകടത്തിൽ നിന്ന് രക്ഷപ്പെട്ടത്. പരിക്കേറ്റ ഇയാളെ ആശുപത്രിയിൽ പ്രവേശിപ്പിച്ചു. അപകടസമയത്ത് വിമാനത്തിൽ ആയുധങ്ങളോ സ്ഫോടകവസ്തുക്കളോ ഉണ്ടായിരുന്നില്ലെന്നും പ്രതിരോധ മന്ത്രാലയം വ്യക്തമാക്കി.
നാല് ടർബോപ്രോപ്പ് എൻജിനുകളുള്ള ടിയു-95 ബോംബർ റഷ്യൻ വ്യോമസേനയുടെ പ്രധാന തന്ത്രപ്രധാന വിമാനങ്ങളിലൊന്നാണ്. ശീതയുദ്ധകാലം മുതൽ സേവനത്തിലുള്ള വിമാനം യുക്രെയ്നെതിരായ റഷ്യയുടെ സൈനിക നീക്കങ്ങളിലും ക്രൂയിസ് മിസൈലുകൾ വിക്ഷേപിക്കാൻ ഉപയോഗിച്ചിട്ടുണ്ട്.
അപകടത്തിന്റെ സാങ്കേതിക കാരണം കണ്ടെത്താൻ അന്വേഷണം ആരംഭിച്ചു. 2025 ജൂണിൽ യുക്രെയ്ൻ നടത്തിയ ‘സ്പൈഡർവെബ്’ ഓപ്പറേഷനിലും റഷ്യയുടെ നിരവധി ടിയു-95 വിമാനങ്ങൾ ഡ്രോൺ ആക്രമണത്തിൽ തകർന്നതായും കേടുപാടുകൾ സംഭവിച്ചതായും റിപ്പോർട്ടുകളുണ്ടായിരുന്നു.
