സംസ്ഥാനത്തെ സർക്കാർ ആശുപത്രികളുടെ ആശുപത്രി വികസന സമിതികളിൽ സ്ത്രീ പ്രാതിനിധ്യം ഉറപ്പാക്കി ആരോഗ്യവകുപ്പ്. HDS എക്സിക്യൂട്ടീവ് കമ്മിറ്റികളിലേക്ക് വനിതാ, SC/ST പ്രതിനിധികളെ നാമനിർദേശം ചെയ്ത് സർക്കാർ ഉത്തരവിറക്കി.
മെഡിക്കൽ കോളേജുകൾ, ജനറൽ ആശുപത്രികൾ, സ്പെഷ്യാലിറ്റി ആശുപത്രികൾ ഉൾപ്പെടെയുള്ള സ്ഥാപനങ്ങളിലെ HDS കമ്മിറ്റികളിലാണ് പുതിയ പ്രതിനിധികളെ ഉൾപ്പെടുത്തിയത്. തിരുവനന്തപുരം മെഡിക്കൽ കോളേജ് ആശുപത്രി, SAT ആശുപത്രി, സർക്കാർ ഡെന്റൽ കോളേജ് എന്നിവിടങ്ങളിൽ വനിതാ പ്രതിനിധിയായി പി.കെ. സുധയെയും SC/ST പ്രതിനിധിയായി ജി.എസ്. ശ്രീകുമാറിനെയും തിരഞ്ഞെടുത്തു.
മറ്റ് ജില്ലകളിലെ സർക്കാർ മെഡിക്കൽ കോളേജുകൾ, ജില്ലാ ആശുപത്രികൾ, ജനറൽ ആശുപത്രികൾ എന്നിവിടങ്ങളിലേക്കുള്ള പ്രതിനിധികളെയും തീരുമാനിച്ചിട്ടുണ്ട്. സർക്കാർ ആശുപത്രികളുടെ സമഗ്ര വികസനത്തിൽ കൂടുതൽ സാമൂഹിക പങ്കാളിത്തം ഉറപ്പാക്കുകയാണ് ലക്ഷ്യമെന്ന് ആരോഗ്യവകുപ്പ് അറിയിച്ചു.
