നിയമസഭ കയ്യാങ്കളി കേസിൽ വിചാരണ നവംബർ മൂന്നിന് ആരംഭിക്കും. തിരുവനന്തപുരം സി.ജെ.എം കോടതിയിലാണ് വിചാരണ നടപടികൾ തുടങ്ങുന്നത്. കേസിൽ നിർണായകമായ നടപടികൾ ഏഴ് വർഷത്തിന് ശേഷമാണ് നടക്കുന്നത്.സി.പി.ഐ.എം നേതാക്കളായ വി. ശിവൻകുട്ടി, ഇ.പി. ജയരാജൻ എന്നിവർ ഉൾപ്പെടെ ആറ് പേരാണ് കേസിലെ പ്രതികൾ. കെ.ടി. ജലീൽ, കെ. അജിത്, സി.കെ. സദാശിവൻ, കെ. കുഞ്ഞുമുഹമ്മദ് എന്നിവരാണ് മറ്റ് പ്രതികൾ.
2015 മാർച്ച് 13നാണ് കേസിനാസ്പദമായ സംഭവം. അന്നത്തെ ധനമന്ത്രി കെ.എം. മാണി ബജറ്റ് അവതരിപ്പിക്കുന്നതിനിടെ പ്രതിപക്ഷം പ്രതിഷേധവുമായി സഭയുടെ നടുത്തളത്തിലിറങ്ങി. ബാർ കോഴ ആരോപണത്തിൽ കെ.എം. മാണിക്കെതിരെ പ്രതിഷേധിച്ചായിരുന്നു പ്രതിപക്ഷത്തിന്റെ നടപടി.
പ്രതിഷേധം സംഘർഷത്തിലേക്ക് നീങ്ങിയതോടെ സ്പീക്കറുടെ ഡയസിൽ കയറി കസേരകൾ മറിച്ചിടുകയും നിയമസഭയിലെ ഉപകരണങ്ങൾ നശിപ്പിക്കുകയും ചെയ്തെന്നാണ് കേസ്. നിയമസഭയിലുണ്ടായ നാശനഷ്ടങ്ങൾ ചൂണ്ടിക്കാട്ടി നിയമസഭാ സെക്രട്ടറിയുടെ പരാതിയിലാണ് പൊലീസ് കേസെടുത്തത്.ബജറ്റ് അവതരണം തടസ്സപ്പെടുത്തുകയും നിയമസഭയിലെ പൊതുമുതൽ നശിപ്പിക്കുകയും ചെയ്തുവെന്നാണ് പ്രതികൾക്കെതിരായ പ്രധാന ആരോപണം. നവംബർ മൂന്നിന് ആരംഭിക്കുന്ന വിചാരണയിൽ കേസുമായി ബന്ധപ്പെട്ട തെളിവുകളും സാക്ഷിമൊഴികളും പരിശോധിക്കും.
