സുഹൃത്തിന്റെ റേഞ്ച് റോവർ കാർ ഔദ്യോഗിക ആവശ്യങ്ങൾക്ക് ഉപയോഗിച്ചതുമായി ബന്ധപ്പെട്ട വിവാദത്തിൽ വിശദീകരണവുമായി മന്ത്രി കെ.എം. ഷാജി. സ്വകാര്യ വാഹനം സർക്കാർ ആവശ്യങ്ങൾക്ക് ഉപയോഗിക്കുന്നത് ചട്ടലംഘനമല്ലെന്നാണ് മന്ത്രിയുടെ വാദം. മറ്റ് മന്ത്രിമാർ സ്വകാര്യ വാഹനം ഉപയോഗിക്കാൻ അനുമതി തേടിയത് കീഴ്വഴക്കത്തിന്റെ ഭാഗമായാണെന്നും കെ.എം. ഷാജി പറഞ്ഞു.
വിദേശയാത്ര കഴിഞ്ഞ് നാട്ടിൽ തിരിച്ചെത്തിയ മന്ത്രി, സർക്കാർ അനുവദിച്ച ഔദ്യോഗിക വാഹനത്തിലാണ് മാധ്യമങ്ങളെ കണ്ടത്. തന്റെ വാദം ശരിവയ്ക്കുന്ന രേഖകളും മന്ത്രി ഹാജരാക്കി. സർക്കാർ അനുവദിക്കുന്നത് പ്രത്യേക കാർ അല്ലെന്നും വാഹനത്തിന്റെ നമ്പറാണെന്നും അദ്ദേഹം വ്യക്തമാക്കി.
മന്ത്രിമാർക്ക് സ്വകാര്യ വാഹനത്തിൽ സഞ്ചരിക്കാം. ഔദ്യോഗിക വാഹനം സ്വകാര്യ ആവശ്യങ്ങൾക്ക് ഉപയോഗിക്കുന്നതാണ് ചട്ടലംഘനമെന്നും കെ.എം. ഷാജി പറഞ്ഞു.സ്വകാര്യ വാഹനം ഔദ്യോഗിക ആവശ്യങ്ങൾക്ക് ഉപയോഗിക്കാൻ അനുമതി തേടേണ്ടതില്ലെങ്കിൽ മൂന്ന് മന്ത്രിമാർ സ്വന്തം വാഹനം ഉപയോഗിക്കാൻ അനുമതി തേടിയത് എന്തിനെന്ന ചോദ്യത്തിനും മന്ത്രി മറുപടി നൽകി. അനുമതി തേടിയത് കീഴ്വഴക്കത്തിന്റെ ഭാഗമായാണെന്നാണ് വിശദീകരണം.
കൂർഗ് യാത്രയ്ക്ക് രണ്ട് ദിവസത്തേക്ക് അനുമതി തേടിയത് സംസ്ഥാനത്തിന് പുറത്തേക്ക് പോകേണ്ട സാഹചര്യമുണ്ടായതിനാലാണെന്നും മന്ത്രി പറഞ്ഞു. സുഹൃത്തുക്കളുടെ സൗജന്യം സ്വീകരിക്കുന്നതിൽ തെറ്റില്ലെന്നും, അതിന് പ്രത്യുപകാരം ചെയ്യാതിരുന്നാൽ മതിയെന്നും അദ്ദേഹം വ്യക്തമാക്കി.
നിയമപ്രശ്നമില്ലെങ്കിലും പ്രവർത്തകർക്ക് വ്യക്തത നൽകുന്നതിനാണ് വിശദീകരണം നടത്തുന്നതെന്നും കെ.എം. ഷാജി പറഞ്ഞു. സിപിഐഎം സൈബർ സംഘങ്ങൾ നടത്തിയ ആക്രമണം മാധ്യമങ്ങൾ ഏറ്റെടുക്കുകയായിരുന്നുവെന്നും മന്ത്രി ആരോപിച്ചു. റേഞ്ച് റോവർ കാറിന് മുന്നിൽ നിൽക്കുന്ന എഐ ചിത്രം മാധ്യമങ്ങൾ പ്രചരിപ്പിച്ചെന്നും അദ്ദേഹം വിമർശിച്ചു.
വിദേശയാത്രയെക്കുറിച്ചും മന്ത്രി വിശദീകരിച്ചു. വേൾഡ് മലയാളി ഫോറത്തിന്റെ ക്ഷണപ്രകാരമാണ് ബൾഗേറിയ സന്ദർശിച്ചതെന്ന് കെ.എം. ഷാജി പറഞ്ഞു. റേഞ്ച് റോവർ വിവാദത്തിൽ മുസ്ലിം ലീഗ് നേതൃത്വത്തിന്റെ പൂർണ പിന്തുണയുണ്ടെന്നും മന്ത്രി വ്യക്തമാക്കി
