പിഎസ് സി ആസൂത്രണ ബോർഡ് ചീഫ് തസ്തികയിലേക്ക് നടത്തിയ നിയമനങ്ങൾ പുന പരിശോധിക്കണമെന്ന് പ്രത്യേക അന്വേഷണ സംഘം.സർക്കാരിന് കത്ത് നൽകി. അതേസമയം പുനർ മൂല്യനിർണയം പൂർത്തിയാക്കിയ പിഎസ് സി പുതിയ റാങ്ക് പട്ടിക ഉടൻ പ്രസിദ്ധീകരിക്കും.അതിനിടെ ചൊവ്വാഴ്ച മുതൽ പിഎസ് സി യിൽ എത്തി അംഗങ്ങളുടെ മൊഴി എടുക്കാൻ SIT യും തീരുമാനിച്ചു
58 മാർക്കിന്റെ 10 ചോദ്യങ്ങൾ മൂല്യ നിർണയം നടത്താതെ ഒഴിവാക്കി ആണ് ഇടത് സംഘടന പ്രവർത്തകൻ ആയ വ്യക്തിക്ക് ആസൂത്രണ ബോർഡ് ചീഫ് തസ്തികയിലേക്ക് സ്ഥാനം ഉറപ്പിച്ചത്. ക്രമക്കേടിൽ പിഎസ് സി മുൻ ഡെപ്യൂട്ടി സെക്രട്ടറി പി സതീഷ്, അഡീഷണൽ സെക്രട്ടറി ആർ ഹരി എന്നിവർക്ക് പങ്ക് ഉണ്ടെന്നും എസ്ഐടി കണ്ടെത്തിയിരുന്നു. ഇതിനു പിന്നാലെ ആണ് നിയമനം പുനപരിശോധിക്കണം എന്നാവശ്യപ്പെട്ട് എസ്ഐടി സർക്കാരിന് കത്ത് നൽകിയത്.അരുൺ പ്രതാപ്,സജിമോൻ ഇങ്ങനെ രണ്ടു പേർക്കാണ് നിയമനം ലഭിച്ചത്.
അതിനിടെ ഭരണഘടന പരിരക്ഷ ചൂണ്ടി കാട്ടി മൊഴി നൽകാൻ അന്വേഷണ സംഘത്തിനു മുന്നിൽ അങ്ങോട്ട് പോയി ഹാജരാകാനാകില്ലെന്ന് വ്യക്തമാക്കി പിഎസ് സി എസ്ഐടിക്ക് കത്ത് നൽകി. ഇതിനു പിന്നാലെ പിഎസ് സി ചേമ്പറിൽ എത്തി മൊഴി എടുക്കാൻ ക്രൈം ബ്രാഞ്ചും തീരുമാനിച്ചു. ഡോക്ടർ എസ് ശ്രീകുമാർ, എസ് എ സൈഫ്,അബ്ദുൽ സമദ് വി ടി കെ, ഡോക്ടർ സി കെ ഷാജിത് എന്നിവർക്ക് ആണ് ആദ്യഘട്ടത്തിൽ മൊഴി എടുക്കാൻ എസ്ഐടി നോട്ടീസ് നൽകിയത്.പിഎസ് സി ചെയർമാനും അംഗങ്ങളും എല്ലാം പിണറായി വിജയൻ സർക്കാരിന്റെ കാലത്ത് നിയമിതരായവരാണ്.
