അമ്പലമേട് വിശ്വാസ വഞ്ചന കേസിൽ തുടർനടപടികൾ നിർത്തിവയ്ക്കണമെന്ന ആവശ്യം ഹൈക്കോടതി തള്ളിയതോടെ പ്രതികളായ അഗസ്റ്റിൻ സഹോദരന്മാർ ഉടൻ മജിസ്ട്രേറ്റ് കോടതിയെ സമീപിച്ചേക്കും. വിഷയത്തിൽ ഹൈക്കോടതി ഇടപെടില്ലെന്നും, ഇക്കാര്യം ചോറ്റാനിക്കര മജിസ്ട്രേറ്റ് കോടതിയിൽ അപേക്ഷയായി നൽകാനുമാണ് ഇന്നലെ ഉത്തരവിട്ടത്.
പ്രതികളുടെ അപേക്ഷയിൽ മജിസ്ട്രേറ്റ് കോടതിയുടെ തീരുമാനം നിർണായകമാകും. വനംവകുപ്പ് രജിസ്റ്റർ ചെയ്ത സുൽത്താൻ ബത്തേരി കോടതിയിലെ കേസുമായി ബന്ധപ്പെട്ട അന്തിമ കുറ്റപത്രം സമർപ്പിക്കുന്നത് വരെ അമ്പലമേട് കേസിലെ നടപടികൾ താൽക്കാലികമായി നിർത്തിവയ്ക്കണമെന്നാണ് പ്രതികളുടെ ആവശ്യം.
വയനാട് മേപ്പാടി വനമേഖലയിൽ നിന്ന് അനധികൃതമായി മുറിച്ചുകടത്തിയ മരം ലൈസൻസുള്ളതാണെന്ന് വിശ്വസിപ്പിച്ച് എറണാകുളം കരിമുകളിലെ തടി വ്യവസായിക്ക് വിറ്റുവെന്നാണ് കേസ്. റോജി അഗസ്റ്റിൻ, ആന്റോ അഗസ്റ്റിൻ, ജോസുകുട്ടി അഗസ്റ്റിൻ എന്നിവരാണ് പ്രതികൾ.കേസിൽ പ്രതികളുടെ ആവശ്യം ഹൈക്കോടതി തള്ളുന്നത് ഇത് രണ്ടാം തവണയാണ്. കേസ് റദ്ദാക്കണമെന്നാവശ്യപ്പെട്ട് നേരത്തെ നൽകിയ ഹർജിയും ഹൈക്കോടതി തള്ളിയിരുന്നു. ഇതിന് പിന്നാലെയാണ് കേസിലെ തുടർനടപടികൾ താൽക്കാലികമായി നിർത്തിവയ്ക്കണമെന്ന ആവശ്യവും ഹൈക്കോടതി തള്ളിയത്.
