മലയാള മാസമായ ചിങ്ങത്തിലെ ആദ്യ ഞായറാഴ്ചയായ ഓഗസ്റ്റ് 23-ന് ഗുരുവായൂർ ക്ഷേത്രത്തിൽ വിവാഹങ്ങളുടെ എണ്ണത്തിൽ സർവകാല റെക്കോഡ്.ഇതുവരെ 392 വിവാഹങ്ങളാണ് ബുക്ക് ചെയ്തത്. 23-ാം തീയതി വരെ ബുക്കിംഗിന് അവസരമുള്ളതിനാൽ വിവാഹങ്ങളുടെ എണ്ണം 400 കടന്നേക്കുമെന്നാണ് വിലയിരുത്തൽ.2024 സെപ്റ്റംബർ 8ന് നടന്ന 334 വിവാഹങ്ങളാണ് ഗുരുവായൂരിലെ നിലവിലെ റെക്കോർഡ്. ചിങ്ങമാസത്തിലെ പ്രധാന മുഹൂർത്തമായ ഓഗസ്റ്റ് 23ന് ഈ റെക്കോർഡ് മറികടക്കുമെന്നാണ് പ്രതീക്ഷ.
വിവാഹത്തിരക്ക് കണക്കിലെടുത്ത് നിലവിലുള്ള നാല് മണ്ഡപങ്ങൾക്ക് പുറമെ അഞ്ചാമതൊരു മണ്ഡപവും ഗുരുവായൂർ ദേവസ്വം ഒരുക്കിയിട്ടുണ്ട്.ചെന്നൈയിൽ നിന്നുള്ള ഒരു ഭക്തനാണ് ഈ മണ്ഡപം വഴിപാടായി നിർമിച്ച് സമർപ്പിക്കുന്നത്. ചിങ്ങപ്പുലരിയിലും ഗുരുവായൂരിൽ വൻ ഭക്തജന തിരക്കാണ് അനുഭവപ്പെട്ടത്. കണ്ണനെ ദർശിക്കാൻ ആയിരങ്ങളാണ് ക്ഷേത്രത്തിലേക്ക് എത്തിയത്. നാളെ ഗുരുവായൂർ ക്ഷേത്രത്തിൽ ഇല്ലം നിറ ചടങ്ങ് നടക്കും.
