ഓണത്തിരക്ക് കുറയ്ക്കാൻ കേരളത്തിലേക്ക് 112 പ്രത്യേക ട്രെയിൻ സർവീസുകൾ പ്രഖ്യാപിച്ച് ഇന്ത്യൻ റെയിൽവെ. ഓഗസ്റ്റ് 14 മുതൽ സെപ്റ്റംബർ 6 വരെയാണ് പ്രധാനമായും സ്പെഷ്യൽ സർവീസുകൾ നടത്തുക.
കേരളത്തിലേക്ക് എത്തുന്ന യാത്രക്കാരുടെ തിരക്ക് പരിഗണിച്ചാണ് അധിക സർവീസുകൾ. ദക്ഷിണ റെയിൽവേയ്ക്ക് പുറമെ സൗത്ത് സെൻട്രൽ, സൗത്ത് വെസ്റ്റേൺ, സൗത്ത് ഈസ്റ്റേൺ റെയിൽവേ സോണുകളും സർവീസുകൾ നടത്തും.
ചെന്നൈ, ബെംഗളൂരു, മൈസൂരു, ഹുബ്ബള്ളി, ഹൈദരാബാദ്, സാന്ത്രാഗാച്ചി തുടങ്ങിയ നഗരങ്ങളിൽ നിന്ന് കേരളത്തിലെ വിവിധ പ്രധാന സ്റ്റേഷനുകളിലേക്കാണ് പ്രത്യേക ട്രെയിനുകൾ. ഓണക്കാലത്തെ വെയ്റ്റ്‌ലിസ്റ്റ് കുറയ്ക്കാനും കൂടുതൽ യാത്രക്കാർക്ക് സൗകര്യമൊരുക്കാനും സർവീസുകൾ സഹായകരമാകും.കഴിഞ്ഞ വർഷത്തെ അപേക്ഷിച്ച് ഇത്തവണ ഓണം സീസണിൽ പ്രത്യേക സർവീസുകളുടെ എണ്ണം ഗണ്യമായി വർധിപ്പിച്ചിട്ടുണ്ട്.
