തിരുവനന്തപുരം നഗരത്തെ അമേരിക്കയിലെ മിസോറി സിറ്റി ഇരട്ടനഗര പദ്ധതിയുമായി ബന്ധിപ്പിക്കാനുള്ള നീക്കവുമായി തിരുവനന്തപുരം നഗരസഭ. ഇതുസംബന്ധിച്ച് തിരുവനന്തപുരം മേയർ വി. വി. രാജേഷും മിസോറി സിറ്റി മേയർ റോബിൻ ഇലക്കാട്ടും പ്രാഥമിക ചർച്ചകൾ നടത്തി.
മേയർ വി. വി. രാജേഷിന്റെ അമേരിക്കൻ സന്ദർശനത്തിനിടെയായിരുന്നു കൂടിക്കാഴ്ച. ഇരുനഗരങ്ങളുടെയും വികസനത്തിനും ജനക്ഷേമത്തിനും സഹായകമായ മേഖലകളിൽ സഹകരണം ശക്തമാക്കാനാണ് ചർച്ച. അടിസ്ഥാന സൗകര്യ വികസനം, പൊതുസേവനങ്ങൾ, തദ്ദേശഭരണം, നിക്ഷേപ-വ്യാപാര സാധ്യതകൾ, സമൂഹ പങ്കാളിത്തം തുടങ്ങിയ മേഖലകളിൽ സംയുക്തമായി പ്രവർത്തിക്കാനാണ് ആലോചന.
തിരുവനന്തപുരം നേരിടുന്ന മാലിന്യ സംസ്കരണവും തെരുവുനായ പ്രശ്നവും പരിഹരിക്കാൻ മിസോറി സിറ്റിയിലെ മാതൃകകൾ പ്രയോജനപ്പെടുത്താനാകുമോയെന്നും ചർച്ചയിൽ വിലയിരുത്തി.
തുടർചർച്ചകൾക്കായി മിസോറി സിറ്റിയിൽ നിന്നുള്ള ഔദ്യോഗിക പ്രതിനിധി സംഘം ഉടൻ തിരുവനന്തപുരത്ത് എത്തും. ഈ ചർച്ചകൾക്ക് ശേഷമായിരിക്കും ഇരട്ടനഗര പദ്ധതിയിൽ അന്തിമ തീരുമാനം കൈക്കൊള്ളുക.
മുമ്പ് ശശി തരൂർ തിരുവനന്തപുരം എംപിയായിരുന്ന കാലത്ത് ബാഴ്സലോണയുമായി ട്വിൻ സിറ്റി പദ്ധതി എന്ന ആശയം മുന്നോട്ടുവന്നിരുന്നെങ്കിലും അത് പ്രാവർത്തികമായിരുന്നില്ല. പുതിയ നീക്കം ആ ആശയത്തിന് വീണ്ടും ജീവൻ നൽകുമോയെന്നതാണ് ശ്രദ്ധേയമാകുന്നത്.
