തിരുവനന്തപുരം പാറശ്ശാലയിൽ ക്ഷേത്രത്തിൽ മോഷണത്തിനെത്തിയ പ്രതിയെ നാട്ടുകാരും ക്ഷേത്ര ജീവനക്കാരും ചേർന്ന് കയ്യോടെ പിടികൂടി. പരശുവയ്ക്കൽ മേലെക്കോണം ഇടനാട്ടുകോണം ക്ഷേത്രത്തിലാണ് സംഭവം.
ഭണ്ഡാരം കുത്തിത്തുറന്ന് കാണിക്കപ്പണവും വിളക്കുകളും ഉൾപ്പെടെയുള്ള സാധനങ്ങളും കവർന്ന് കടന്നുകളയാൻ ശ്രമിക്കുന്നതിനിടെയാണ് പ്രതി പിടിയിലായത്. നിറപുത്തരി ദിനമായതിനാൽ ക്ഷേത്ര ജീവനക്കാർ പതിവിലും നേരത്തെ ക്ഷേത്രത്തിലെത്തിയതാണ് മോഷണശ്രമം തടയാൻ വഴിയായത്.
പ്രതിയെ കീഴ്പ്പെടുത്തുന്നതിനിടെ ക്ഷേത്രത്തിലെ ഒരു ജീവനക്കാരനെ വിളക്കുകൊണ്ട് കുത്താൻ ശ്രമിച്ചെങ്കിലും പരിക്കേൽക്കാതെ രക്ഷപ്പെട്ടു. വിവരമറിഞ്ഞെത്തിയ പൊലീസിന് നേരെയും പ്രതി ആക്രമണത്തിന് ശ്രമിച്ചതായി അധികൃതർ അറിയിച്ചു.പ്രതിയെ പൊലീസ് കസ്റ്റഡിയിലെടുത്ത് കേസെടുത്ത് അന്വേഷണം ആരംഭിച്ചു.
