ജമ്മു-കശ്മീരിലെ ജില്ലയിലെ കേലം മേഖലയിലെ ഇഷ്ടികശാലയ്ക്ക് നേരെയുണ്ടായ ഭീകരാക്രമണത്തിൽ ഛത്തീസ്ഗഡ് സ്വദേശികളായ രണ്ട് അതിഥിത്തൊഴിലാളികൾ കൊല്ലപ്പെട്ടു. വെള്ളിയാഴ്ച വൈകിട്ടാണ് ഭീകരർ തൊഴിലാളികൾക്ക് നേരെ വെടിയുതിർത്തത്. ഗുരുതരമായി പരിക്കേറ്റ ദീപക് റത്രേയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പരിക്കേറ്റ മറ്റൊരാളായ ഭൂപീന്ദറിനെ ആദ്യം അനന്ത്നാഗ് ഗവൺമെന്റ് മെഡിക്കൽ കോളജ് ആശുപത്രിയിലും പിന്നീട് ശ്രീനഗറിലെ എസ്‌കിംസ് ആശുപത്രിയിലും പ്രവേശിപ്പിച്ചെങ്കിലും ചികിത്സയ്ക്കിടെ മരിച്ചു.
ആക്രമണത്തിന് പിന്നാലെ സുരക്ഷാസേന പ്രദേശം വളഞ്ഞ് വ്യാപക തെരച്ചിൽ ആരംഭിച്ചു. ആക്രമണത്തിന് ഉത്തരവാദികളായ ഭീകരരെ കണ്ടെത്താൻ സംയുക്ത ഓപ്പറേഷൻ തുടരുകയാണെന്ന് അധികൃതർ അറിയിച്ചു. സംഭവത്തെ ജമ്മു-കശ്മീർ ലഫ്റ്റനന്റ് ഗവർണർ മനോജ് സിൻഹ ശക്തമായി അപലപിച്ചു. കുറ്റക്കാർക്കെതിരെ കർശന നടപടി സ്വീകരിക്കുമെന്നും സാധാരണക്കാരെ ലക്ഷ്യമിട്ടുള്ള ഭീകരപ്രവർത്തനങ്ങളെ ശക്തമായി നേരിടുമെന്നും അദ്ദേഹം വ്യക്തമാക്കി.
കഴിഞ്ഞ മാസങ്ങളിൽ വിനോദസഞ്ചാരികളെയും അതിഥിത്തൊഴിലാളികളെയും ലക്ഷ്യമിട്ട് നടന്ന ആക്രമണങ്ങളുടെ പശ്ചാത്തലത്തിൽ ഉണ്ടായ ഈ സംഭവം വീണ്ടും കശ്മീരിലെ സുരക്ഷാ സാഹചര്യങ്ങളെക്കുറിച്ചുള്ള ആശങ്ക വർധിപ്പിച്ചിരിക്കുകയാണ്.
