മുംബൈയ്ക്ക് സമീപം മഹാരാഷ്ട്രയിലെ താനെ ജില്ലയിലെ ഭിവണ്ടിയിൽ നാലുനില താമസക്കെട്ടിടം തകർന്നുവീണ് എട്ട് പേർ മരിച്ചു. സംഭവത്തിൽ നിരവധി പേർക്ക് പരിക്കേറ്റതായും 11 പേർ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായി പ്രാഥമിക വിവരം.രക്ഷാപ്രവർത്തനം പുരോഗമിക്കുന്നതിനാൽ മരണസംഖ്യ ഇനിയും ഉയരാനിടയുണ്ടെന്നാണ് അധികൃതർ അറിയിച്ചു.വ്യാഴാഴ്ച രാത്രി പതിനൊന്നരയോടെയാണ് ഭിവണ്ടിയിലെ ബാലാജി നഗർ പ്രദേശത്തുള്ള കോഹിനൂർ എന്ന നാലുനില കെട്ടിടത്തിന്റെ ഒരു ഭാഗം തകർന്നുവീണത്. കെട്ടിടത്തിൽ അറ്റകുറ്റപ്പണികൾ നടന്നുകൊണ്ടിരിക്കെയായിരുന്നു അപകടം.
ദേശീയ ദുരന്തനിവാരണ സേന , താനെ ദുരന്തനിവാരണ സേന , അഗ്നിരക്ഷാസേന, പൊലീസ് എന്നിവയുടെ നേതൃത്വത്തിൽ അവശിഷ്ടങ്ങൾ നീക്കി കുടുങ്ങിക്കിടക്കുന്നവരെ കണ്ടെത്താനുള്ള തിരച്ചിൽ തുടരുകയാണ്.അപകടത്തിന്റെ കാരണം അന്വേഷിച്ചുവരികയാണ്. കെട്ടിടത്തിന്റെ സുരക്ഷാ നിലയെയും അറ്റകുറ്റപ്പണികൾ നടന്ന സാഹചര്യങ്ങളെയും കുറിച്ചും അന്വേഷണം ആരംഭിച്ചതായി അധികൃതർ അറിയിച്ചു.
