തനിക്കെതിരെ വ്യാജവാർത്ത പ്രചരിപ്പിച്ചവർക്കെതിരെ ക്രിമിനൽ നടപടി ആവശ്യപ്പെട്ട് സിപിഐഎം കേന്ദ്ര കമ്മിറ്റി അംഗം പി.കെ ശ്രീമതി മുഖ്യമന്ത്രി, ആഭ്യന്തരമന്ത്രി, ഡിജിപി, വനിതാ കമ്മീഷൻ അധ്യക്ഷ എന്നിവർക്ക് പരാതി നൽകി. സമൂഹമാധ്യമങ്ങളിൽ പ്രചരിക്കുന്ന വ്യാജവാർത്തകൾ നീക്കം ചെയ്യണമെന്നും പരാതിയിൽ ആവശ്യപ്പെട്ടിട്ടുണ്ട്.
മുൻ എംഎൽഎ പി.ആർ. കൃഷ്ണന്റെ ഭാര്യയുടെ പേരും പി.കെ ശ്രീമതി എന്നാണ്. ഈ പേരിന്റെ സാമ്യം ഉപയോഗിച്ച് താൻ മുൻ എംഎൽഎയുടെ ഭാര്യയെന്ന പേരിൽ പെൻഷൻ കൈപ്പറ്റുന്നുവെന്ന വ്യാജപ്രചരണമാണ് ചില മാധ്യമങ്ങളും സമൂഹമാധ്യമ അക്കൗണ്ടുകളും നടത്തിയതെന്ന് പരാതിയിൽ പറയുന്നു. വ്യാജവാർത്തകളുടെ ലിങ്കുകൾ ഉൾപ്പെടുത്തിയാണ് പരാതി സമർപ്പിച്ചിരിക്കുന്നത്.
ഭർത്താവ് മരിച്ച് 10 മാസം പോലും തികയാത്ത സാഹചര്യത്തിൽ ഇത്തരമൊരു പ്രചാരണം അപമാനകരവും മാനസികമായി തളർത്തുന്നതുമാണെന്നും പരാതിയിൽ ചൂണ്ടിക്കാട്ടുന്നു.ജനം ടിവി, കർമ്മ ന്യൂസ്, സുദിനം പത്രം, ഡെയിലി ഹണ്ട് എന്നിവർക്കെതിരെയാണ് പരാതി നൽകിയിരിക്കുന്നത്.പി കെ ശ്രീമതിയുടെ പരാതി സത്യമാണെന്ന് നിയമസഭാ സെക്രട്ടറിയേറ്റും അറിയിച്ചിട്ടുണ്ട് .സിപിഐഎം സംസ്ഥാന കമ്മിറ്റിയും പി കെ ശ്രീമതിക്ക് പിന്തുണ നൽകി.
