ഹോർമുസ് കടലിടുക്കിലെ സംഘർഷം രൂക്ഷമായിരിക്കെ ചെങ്കടലിലേക്കും പ്രതിസന്ധി വ്യാപിപ്പിക്കുമെന്ന മുന്നറിയിപ്പുമായി ഇറാൻ. അമേരിക്കൻ സൈനിക നടപടികൾ തുടർന്നാൽ, ആഗോള വ്യാപാരത്തിന് നിർണായകമായ ബാബ് അൽ-മന്ദേബ് കടലിടുക്കും (ചെങ്കടൽ പ്രവേശന കവാടം) ലക്ഷ്യമിടുമെന്ന് ഇറാൻ മുന്നറിയിപ്പ് നൽകിയതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഹോർമുസ് കടലിടുക്കിന് പിന്നാലെ ചെങ്കടൽ പാതയും തടസ്സപ്പെട്ടാൽ ആഗോള എണ്ണവിതരണവും ചരക്ക് ഗതാഗതവും ഗുരുതരമായി ബാധിക്കുമെന്ന ആശങ്ക ശക്തമാണ്.
യൂറോപ്പിനെയും ഏഷ്യയെയും ബന്ധിപ്പിക്കുന്ന പ്രധാന സമുദ്രപാതയായതിനാൽ, ഇവിടെ സംഘർഷം രൂക്ഷമായാൽ എണ്ണവിലയിലും ചരക്കുകൂലിയിലും വീണ്ടും വലിയ വർധനയുണ്ടാകാൻ സാധ്യതയുണ്ടെന്നാണ് വിലയിരുത്തൽ. അതേസമയം, അമേരിക്ക ഇറാനെതിരായ സൈനിക സമ്മർദം ശക്തമാക്കിയതോടെ പശ്ചിമേഷ്യയിലെ സുരക്ഷാ സാഹചര്യം കൂടുതൽ വഷളായിരിക്കുകയാണ്. ഇരുരാജ്യങ്ങളും പരസ്പരം കടുത്ത മുന്നറിയിപ്പുകൾ തുടരുന്നതിനാൽ സംഘർഷം കൂടുതൽ വ്യാപിക്കുമോയെന്ന ആശങ്കയും ഉയരുന്നു
