വർക്കലയിൽ നഗരസഭ ആരോഗ്യവിഭാഗത്തിന്റെ മിന്നൽ പരിശോധനയിൽ പഴകിയതും വൃത്തിഹീനമായി സൂക്ഷിച്ചതുമായ ഭക്ഷ്യവസ്തുക്കൾ പിടിച്ചെടുത്തു. മൈതാനത്തെ ദ്വാരക ഹോട്ടൽ, പുത്തൻചന്തയിലെ ദോഹ ഹോട്ടൽ, റെയിൽവേ സ്റ്റേഷന് സമീപത്തെ ഹാഷിം ബേക്കറി എന്നിവിടങ്ങളിലായിരുന്നു പരിശോധന.
ദോഹ ഹോട്ടലിൽ നിന്ന് പഴകിയ ബീഫും മാങ്ങാ അച്ചാറും ഉൾപ്പെടെയുള്ള ഭക്ഷ്യവസ്തുക്കൾ പിടിച്ചെടുത്തു. ദ്വാരക ഹോട്ടലിൽ വണ്ട് നിറഞ്ഞതും പൂപ്പൽ ബാധിച്ചതുമായ മാവ്, വൃത്തിഹീനമായി സൂക്ഷിച്ചിരുന്ന സോസ് എന്നിവയും കണ്ടെത്തി.ഹാഷിം ബേക്കറിയിൽ ജ്യൂസ് തയ്യാറാക്കാനായി അഴുകിയ പൈനാപ്പിളും മറ്റ് ഭക്ഷ്യവസ്തുക്കളും സൂക്ഷിച്ചിരുന്നതായും പരിശോധനയിൽ വ്യക്തമായി.
പരിശോധനയിൽ ക്രമക്കേട് കണ്ടെത്തിയ മൂന്ന് സ്ഥാപനങ്ങൾക്കും നേരത്തെയും ആരോഗ്യവിഭാഗം പിഴ ചുമത്തിയിട്ടുള്ളതാണെന്ന് അധികൃതർ അറിയിച്ചു. പിടിച്ചെടുത്ത ഭക്ഷ്യവസ്തുക്കൾ നശിപ്പിക്കുമെന്നും ഭക്ഷ്യസുരക്ഷ ഉറപ്പാക്കാൻ വരും ദിവസങ്ങളിലും പരിശോധനകൾ ശക്തമായി തുടരുമെന്നും ഹെൽത്ത് ഇൻസ്പെക്ടർ അറിയിച്ചു.
