കോഴിക്കോട് നഗരത്തിന്റെ വിവിധ ഭാഗങ്ങളിൽ നടത്തിയ വ്യാപക ലഹരി വിരുദ്ധ പരിശോധനയിൽ മൂന്ന് വ്യത്യസ്ത കേസുകളിലായി 11 പേർ പിടിയിലായി. എംഡിഎംഎയും ഹാഷിഷ് ഓയിലും ഉൾപ്പെടെയുള്ള ലഹരിവസ്തുക്കൾ പ്രതികളിൽ നിന്ന് പോലീസ് പിടിച്ചെടുത്തു.
പാലാഴിയിൽ നടത്തിയ പരിശോധനയിൽ 93 ഗ്രാം ഹാഷിഷ് ഓയിലും 7 ഗ്രാം എംഡിഎംഎയും കൈവശം സൂക്ഷിച്ചിരുന്ന എട്ടംഗ സംഘത്തെ പോലീസ് അറസ്റ്റ് ചെയ്തു.കാരാപറമ്പിൽ നടത്തിയ പരിശോധനയിൽ സ്ഥിരം ലഹരി വിൽപ്പനക്കാരനെന്ന് പോലീസ് സംശയിക്കുന്ന മലപ്പുറം സ്വദേശി മുഹമ്മദ് വാഹിദ് 1.51 ഗ്രാം എംഡിഎംഎയും ഇലക്ട്രോണിക് ത്രാസുമായി പിടിയിലായി.
അതേസമയം, പുതിയ സ്റ്റാൻഡ് പരിസരത്ത് കസബ പോലീസ് നടത്തിയ പരിശോധനയിൽ കോഴിക്കോട് കൊളത്തറ റഹ്മാൻ ബസാർ സ്വദേശികളായ ഷിബിലി റഹ്മാനും സുഹൈലും 19 ഗ്രാം എംഡിഎംഎയുമായി പിടിയിലായി.സംഭവങ്ങളിൽ പ്രത്യേകം കേസുകൾ രജിസ്റ്റർ ചെയ്ത പോലീസ് ലഹരി വിതരണ ശൃംഖലയെക്കുറിച്ചുള്ള അന്വേഷണം വ്യാപിപ്പിച്ചിരിക്കുകയാണ്.
